DILI (TOP) – Eis Prezidente Autoridade ba Rejiaun Administrativu Espesial Oe-Kusi Ambeno (RAEOA) atual Sekretariu Jeral partidu FRETILIN, Mari Bin Amude Alkatiri ohin kompleta ona loron 22 hela iha rai-liur.
Alkatiri sai husi teritóriu Timor-Leste dehan atu ba Portugal iha loron Kuarta, 29 Dezembru 2021 no to’o ohin Kuarta, 19 Janeiru 2022 kompleta ona loron 22 mós seidauk fila hela de’it maske antes ne’e promete ona dehan seidauk to’o semana rua sei mai fali Timor-Leste.
Alkatiri sai ba rai-liur hafoin eis Ministru Interior, Rogerio Tiago Lobato mós foin maka tun husi aviaun iha aeroportu Komoro-Dili.
Notisia relevante: Rogerio Lobato to’o Dili, Alkatiri “halai” ona ba Portugal
Mosu mós komentariu balun katak, Alkatiri nia viajen ba Portugal ne’e atu diskuti tan ho nain ba kompañia Atlantic Eagle Shipbuilding kona-ba ro HAKSOLOK.
Faktu hatudu, iha 2018 Autoridade Rejiaun Administrativu Espesial Oe-Kusi Ambeno (RAEOA) konkorda ona ho kompañia Atlantic Eagle Shipbuilding atu governu Timor-Leste aumenta tan osan millaun $27 hodi finansia konstrusaun ro HAKSOLOK ne’ebé to’o oras ne’e povu Timor-Leste tomak seidauk hatene ro HAKSOLOK ne’e lahatene loos sei haksolok iha fatin ne’ebé loos. Bazeia ba akordu ida ne’e maka governasaun Primeiru-Ministru, Taur Matan Ruak liu husi Orsamentu Jeral Estadu tinan 2021 aloka uluk ona millaun $14 husi millaun $27 ba ro HAKSOLOK ne’e.
Alkatiri selu hotu ona osan lubuk ida ba kompañ Atlantic Eagle hodi husik de’it ro HAKSOLOK tama ba tasi laran, infelizmente to’o oras ne’e ro HAKSOLOK seidauk to’o mai Timor-Leste.
Serimonia husik ro HAKSOLOK tama ba tasi Portugal nian ne’e partisipa husi Bispu Don Carlos Filipe Ximenes Belo, SDB ho Madre Guilhermina hanesan Haksolok nia inan-sarani.
Alkatiri habosok Don Carlos ho Madre Guilhermina katak, ro HAKSOLOK prontu ona atu ba ba Timor-Leste iha fulan Maiu 2017 no to’o iha Dili iha fulan Novembru 2017. Sura de’it loron atu tinan 2021 remata ona hodi hakat tan on aba tinan 2022 mós ro HAKSOLOK ne’e nia lalatak de’it mós seidauk to’o mai Timor-Leste. Negosiasaun ba ro HAKSOLOK ne’e hatudu momoos Alkatiri la’os ‘bom jestor’, maibé kategoria ba ‘mal jestor’.
Kona-ba ema barak maka dehan hotar Alkatiri durante ne’e, nia (Alkatiri) rasik mós rekoñese kestaun ne’e.
“Sira hotu-hotu hein hela ha’u atu mate. Mas, ha’u sei moris naruk, ne’e la iha dúvida,” Alkatiri konfirma kestaun ne’e nu’udar haktuir iha reportajen media online Hatutan.com.
Alkatiri hatutan, ninia viajen ba Portugal la’os atu halo tratamentu ba nia saúde, maibé ba atu simu tinan foun 2022 ho nia membru familia balun iha Portugal inklui mós atu hatan ba konvite sira be durante ne’e nia amigu sira fó ba nia hodi ba Portugal.
“Ha’u agora ba Portugal tanba família barak iha ne’ebá ho ha’u nia oan-mane ida de’it mak ne’e, ho ha’u nia mane-foun, ba para hamutuk iha festa pasajen tinan foun nian no ha’u mós iha amigu barak iha ne’ebá konvite mai iha ne’e, konvite ba, konvite mai, no ha’u la hatene loos atu halo programa halo nusa, tanba ne’e, ha’u sei fó tempu tomak ba família”.
Durante hela iha Lisboa, Portugal, iha loron 09 Janeiru 2022, Alkatiri ho nia fen Marina Ribeiro Alkatiri hatudu tan sira nia kontribuisaun ba kombate hasoru Covid-19, no atu bele iha sistema imunológico forte liu- tan, sira nain-rua simu tan ona doze datoluk ka “booster dose” ba Vacina Kontra Covid-19.
Alkatiri nia oan-feto Nurima Alkatiri mós sai kleur husi teritóriu Timor-Leste, no tuir informasaun balun ne’ebé The Oe-Kusi Post (TOP) asesu katak, durante ne’e Nurima manan salariu boot nu’udar asesora ida iha governasaun atual, maibé serbisu liu husi mundu virtual de’it maske Prezidente partidu FRETILIN atual Prezidente Repúblika, Francisco Guterres Lú Olo deklara laiha ona Estadu emerjensia iha tempu hirak liuba.
