DILI (TOP) – Iha ona kandidatu Prezidente Repúblika 2022-2027 hamutuk nain 8 maka submeter ona sira nia dokumentu sira ba iha Diresaun Jeral Serbisu ba Rejistu no Notariadu iha Ministériu Justisa hodi halo autentifikasaun.
Entre kandidatu na'in 8, na'in 2 mak kandidata aan liuhusi partidu politiku, no na'in 6 seluk mak submete dokumentu autentikasaun maibé, liuhusi dalan independente.
"Kandidatu na'in 8 ne'e maka Isabel da Costa Ferreira, Milena Pires, Constantino Pinto, Antero Benedito da Silva, Lere Anan Timur, Felisberto da Costa liuhusi dalan independente. Atual Prezidente Republika Francisco Guterres Lú Olo kandidatu husi partidu FRETILIN, no atual Vise Primeira Ministra asuntu sosial, Armanda Berta dos Santos kandidatu husi partidu KHUNTO," Diretor ne’e hatutan, molok dokumentu sira ne’e lori ba halo inskrisaun iha Tribunal Supremu Justisa, sira sei halo uluk autentifikasaun.
"Ami la'os halo inskrisaun ba kandidatu Prezidente Republika sira, maibe halo de'it autentikasaun ba kandidatu sira nia dokumentu, tanba ne'e mak dokumentu ne'ebe simu ona komesa horisehik (Tersa) to'o ohin (Kuarta) hamutuk ema na'in 8 ona."
Nia dehan, parte notariadu halo verifikasaun de’it ba dokumentu sira mak hanesan kartaun eleitoral kopia ho orijinal hanesan ka la'e, bainhira halo konfirmasaun ba dokumentu sira ne'e hotu kandidatu sira bele ona ba tau naran iha tribunal supremu justisa.
"Autentikasaun ne'e kandidatu sira lori lista mai hamutuk kartaun eleitoral ho ninia kopia, ami halo verifikasaun katak loos duni kartaun eleitoral nia kopia tuir duni ninia orijinal, mak foin Notariado tau karimbu no asina depois kandidatu sira submete ka ba halo inskrisaun (rejistu) iha tribunal rekursu," nia esplika.
Nia hatutan, parte rejistu notariadu mós hare ba númeru apoiante, ba kestaun númeru apoiante kandidatu na'in 8 prienxe ona rekezitu lei númeru 4/2017, loron 23 Fevereiru, kinta alterasaun ba lei númeru 7/2006, loron 28 Dezembru, kona-ba lei eleitoral ba Prezidente Republika.
Nune'e mos, iha Konstituisaun Republika Demokratika Timor Lorosa'e (KRDTL), ko'alia kona-ba Prezidente Republika iha artigu 75 (elejibilidade).
Prezidente partidu FRETILIN atual Prezidente Repúblika, Francisco Guterres Lú Olo dekreta ona loron eleisaun prezidensial ne’e sei akontese iha loron 19 Marsu 2022.
