DILI (TOP) – Armanda Berta dos Santos ne’ebé durante ne’e hetan akuzasaun barak husi sosiedade kona-ba ko’alia lian nasionál sira la moos, maibé ida ne’e la’os sai impedimentu ba nia hodi avansa tan sai kandidatura ba Prezidente Repúblika.
Maske nia Tetun no Portugues dehan ladun moos, maibé hare ba realidade no lala’ok politika iha Timor-Leste maske ko’alia lian ofisial sira ladun moos mós faktu hatudu katak, durante ne’e Armanda Berta dos Santos assume kargu rua, Vise Primeira-Ministra, no Ministra Solidariedade Sosial no Inkluzaun (MSSI) iha governasaun Primeiru-Ministru, Taur Matan Ruak.
Baze ba assume kargu rua ne’e iha governasaun atual, oras ne’e Armanda Berta ne’ebé antes ne’e baku-fila tiha lia-fuan Mil e oitocentos ba fali Cento oitocentos ho fiar aan tebes deklara sai ona ninia kandidatura ba públiku hodi kompete ba iha eleisaun prezidensial ne’ebé sei akontese iha loron 19 Marsu 2022.
Armanda Berta dehan, ninia kandidatura oras ne’e hetan ona apoiante hamutuk 10.000 husi munisipiu 12 inklui Rejiaun Administrativu Espesial Oe-Kusi Ambeno (RAEOA).
Fen kaben husi José dos Santos Bucar ne’e promete, bainhira manan konfiansa husi povu hodi assume kargu nu’udar Prezidente Repúbliku durante tinan lima, 2022 to’o 2027 sei hakuak-metin Konstituisaun RDTL nu’udar mata-dalan hodi hametin liu-tan Estadu direitu no demokrátiku.
"Ha'u kompromete ba povu Timor Leste katak, karik iha eleisaun prezidensial tinan ida ne'e povu fo fiar, maka ha'u sei kaer metin ba ita nia konstituisaun no prinsipiu fundamentais sira hanesan hametin estadu de direito demokrátiku, hametin pas no estabilidade atu ita nia dezenvolvimentu bele la'o ba oin no hametin relasaun di'ak ho nasaun sira hotu iha mundu internasional," Berta deklara publikamente iha ambitu seremonia ofisial deklarasaun kandidata aan ba Prezidente Republika 2022-2027 iha salaun Esperansa Elemloi-Delta, Kinta 20 Janeiru 2022.
Nia hatutan, sei hakruk no adora loos de’it lei inan Timor-Leste nian bainhira hetan duni konfiansa husi povu.
"Biban ida ne'e, ha'u hakarak deklara se karik povu Timor Leste fo fiar mai ha'u sai hanesan Prezidente Republika, ne'ebe nakonu ho esperansa tau matan ba nasaun ida ne'e ho di'ak. Ha'u sei hakaruk serbi povu no nasaun tuir konstituisaun haruka," nia reforsa.
"Ha'u Berta agradese wain tebes ba suporta tomak hosi povu Timor Leste liuliu ba feto maluk sira hosi aldeia to'o nasional ne'ebe hakarak fo apoiu mai ha'u atu sai imi nia prezidente ba nasaun doben ida ne'e".
Iha fatin hanesan, Vise IV Prezidente Ekipa Susesu, Amuzi Magno katak, to'o agora sira konsege rejisto ona apoiante ne'ebé prontu atu lori Armanda Berta ba tuur iha Ai-Tarak Laran.
"Agora ami rejistu daudaun iha Rihun 10 ona, komforme lori ba STAE ho notariadu ida ne'ebe ba sira haree invalidu sei fo hatene fila fali mai ami. Maibe total ne'ebe mak ami rejistu foin rihun 10, obrigadu," nia hateten.
Entretantu, tuir Diresaun Nasionál ba Rejistu no Notariadu iha Ministériu Justisa nian katak, simu ona ema nain ualu maka hahu hatama ona sira nia dokumentu sira hodi hetan atentifikasaun molok lori ba rejistu iha Tribunal Supremu Justisa.
Notisia relevante: Kandidatu PR nain 8 submete ona sira nia dokumentu
