DILI (TOP) – Eis Ministru Interior, Rogerio Tiago Lobato foin maka tun husi aviaun iha aeroportu Komoro-Dili, Sekretariu Jeral partidu FRETILIN, Mari Bim Amude Alkatiri mós “halai” ona ba Portugal hodi halo tratamentu ba nia saúde, tanba deskonfia sofre moras atu hanesan ho ‘asam lambung’, katak fonte ida husi membru Comite Central FRETILIN (CCF).
Membru CCF ne’ebé husu ba The Oe-Kusi Post (TOP) atu labele públika nia identidade iha notisia ne’e esplika, Alkatiri sofre moras ida atu hanesan ho ‘asam lambung’ kleur ona, no tuir fonte ne’e katak, durante ne’e nia iha problema itoan iha kakorok (esofagus), no mear hela de’it iha tempu kalan.
Fonte membru CCF ne’ebé akompaña Alkatiri to’o aeroportu ne’e ho komik itoan esplika, Alkatiri la'os halai ba Portugal, maibé ohin nia sai ba Portugal duni. Nia dehan, durante ne’e mós ema barak maka hotar Alkatiri, no afirma tan deslokasaun Alkatiri nian ba Portugal ne’e atu halo tratamentu ba moras ne’ebé nia sofre atu hanesan ho ‘asam lambung’.
Deklarasaun husi membru CCF ne’e rejeita total husi membru familia ida Alkatiri nian hodi dehan, deslokasaun Alkatiri ba Portugal ne’e atu simu, no festeza tinan foun 2022 ho nia membru familia balun.
“La’os tanba moras maka nia ba Portugal, maibé nia ba atu selebra tinan foun ho familia balun iha ne’eba,” katak fonte ida nu’udar mós familia besik Alkatiri nian ba The Oe-Kusi Post (TOP) iha aeroportu Komoro-Dili, Kuarta, 29 Dezembru 2021.
“Katuas durante ne’e la sofre moras ruma, nia isin di’ak hela, la moras ida,” afirma fonte ne’e.
Mosu mós komentariu balun katak, Alkatiri nia viajen ba Portugal ne’e atu diskuti tan ho nain ba kompañia Atlantic Eagle Shipbuilding kona-ba ro HAKSOLOK.
Faktu hatudu, iha 2018 Autoridade Rejiaun Administrativu Espesial Oe-Kusi Ambeno (RAEOA) konkorda ona ho kompañia Atlantic Eagle Shipbuilding atu governu Timor-Leste aumenta tan osan millaun $27 hodi finansia konstrusaun ro HAKSOLOK ne’ebé to’o oras ne’e povu Timor-Leste tomak seidauk hatene ro HAKSOLOK ne’e lahatene loos sei haksolok iha fatin ne’ebé loos. Bazeia ba akordu ida ne’e maka governasaun Primeiru-Ministru, Taur Matan Ruak liu husi Orsamentu Jeral Estadu tinan 2021 aloka uluk ona millaun $14 husi millaun $27 ba ro HAKSOLOK ne’e.
Eis Prezidente Autoridade ba RAEOA, Mari Amude Alkatiri selu hotu ona osan lubuk ida ba
kompañ Atlantic Eagle hodi husik de’it ro HAKSOLOK tama ba tasi laran, maibé faktu hatudu to’o oras ne’e seidauk to’o mai Timor-Leste.
Serimonia husik ro HAKSOLOK tama ba tasi Portugal nian ne’e partisipa husi Bispu Don Carlos Filipe Ximenes Belo, SDB ho Madre Guilhermina hanesan Haksolok nia inan-sarani.
Alkatiri habosok Don Carlos ho Madre Guilhermina katak, ro HAKSOLOK prontu ona atu ba ba Timor-Leste iha fulan Maiu 2017 no to’o iha Dili iha fulan Novembru 2017. Sura de’it loron atu tinan 2021 remata ona hodi hakat tan on aba tinan 2022 mós ro HAKSOLOK ne’e nia lalatak de’it mós seidauk to’o mai Timor-Leste. Negosiasaun ba ro HAKSOLOK ne’e hatudu momoos Alkatiri la’os ‘bom jestor’, maibé kategoria ba ‘mal jestor’.
Kona-ba ema barak maka dehan hotar Alkatiri durante ne’e, nia (Alkatiri) rasik mós rekoñese kestaun ne’e.
“Sira hotu-hotu hein hela ha’u atu mate. Mas, ha’u sei moris naruk, ne’e la iha dúvida,” Alkatiri konfirma kestaun ne’e nu’udar haktuir iha reportajen media online Hatutan.com.
Alkatiri hatutan, ninia viajen ba Portugal la’os atu halo tratamentu ba nia saúde, maibé ba atu simu tinan foun 2022 ho nia membru familia balun iha Portugal inklui mós atu hatan ba konvite sira be durante ne’e nia amigu sira fó ba nia hodi ba Portugal.
“Ha’u agora ba Portugal tanba família barak iha ne’ebá ho ha’u nia oan-mane ida de’it mak ne’e, ho ha’u nia mane-foun, ba para hamutuk iha festa pasajen tinan foun nian no ha’u mós iha amigu barak iha ne’ebá konvite mai iha ne’e, konvite ba, konvite mai, no ha’u la hatene loos atu halo programa halo nusa, tanba ne’e, ha’u sei fó tempu tomak ba família”.
Alkatiri sai husi aeroportu Komoro ho aviaun AirAsia, no tuir planu sei fila mai Timor iha tempu badak nia laran.
