DILI (TOP) – Hafoin tun husi aviaun iha aeroportu internasional Prezidente Nicolau Lobato, Komoro-Dili, eis Ministru Interior, Rogerio Tiago Lobato deklara ona atu apoiu Komandante em Xefe das FALINTIL, Kay Rala Xanana Gusmão ba eleisaun prezidensial ne’ebé sei akontese iha fulan Marsu tinan oin, 2022.
Rogerio Lobato durante ne’e desloka ba rai-liur hodi halo tratamentu intensivu ba nia saúde, no rekopera ona maka foin to’o hikas mai Timor-Leste iha loron Kuarta, 29 Dezembru 2021.
The Oe-Kusi Post (TOP) observa, familia lubuk ida maka simu Rogerio Lobato iha aeroportu Komoro iha horas tuku ida liu minutu balun. Membru familia sira ne’e maka hanesan Luis Lobato, Miguel Lobato no membru familia sira seluk tan.
Liu tiha ida ne’e, Rogerio ho nia kaben sa’e kareta Prado mutin ida hodi hakat liuba Hotel-Timor, no membru familia sira mós tuir kedas ba fatin ne’e.
Oras ne’e mosu figura lubun maka deklara públikamente hodi kandidata sira nia aan atu kompete ba iha kurida demokrasia eleisaun prezidensial iha tinan oin, no eis Primeiru-Ministru, Kay Rala Xanana Gusmão maske to’o oras ne’e seidauk hasai ninia pozisaun atu nia mós hakarak kandidata nia aan ka la’e, maibé Rogerio Lobato deklara ona se Xanana kandidata aan, nia sei apoiu nia iha eleisaun prezidensial.
“Maun Boot Xanana nia kandidata, ha’u apoia nia. Xanana nia kandidata ha’u apoiu, se nia apoiu ema seluk, ne’e oin seluk fali,” hatete Rogerio Lobato ba jornalista sira iha aeroportu internasional Prezidente Nicolao Lobato, Komoro-Dili, Kuarta, 29 Dezembru 2021.
