DILI (TOP) – Sidadaun hotu iha rai-laran inklui komunidade internasional fó akreditasaun no prega Komandante em Xefe das FALINTIL, Kay Rala Xanana Gusmão nu’udar lider karismátiku ida, maibé Sekretariu Jeral Partidu FRETILIN, Mari Bin Amude Alkatiri ne’ebé lidera partidu FRETILIN sempre hasoru hela de’it derota politika desde tinan 2007 to’o ohin loron kontinua sukit Xanana hodi dehan se maka lider karismátiku.
Iha tinan 2014, eis Primeiru-Ministru ba governu minoritaria ne’e tane no adora loos Xanana nu’udar Maromak hafoin hetan bensaun husi governasaun Xanana hodi haruka nia sai nu’udar “mandor” ka jestor ba projetu pilotu Zona Espesial ba Ekonomia Sosial Merkadu (ZEESM) iha Rejiaun Administrativu Espesial Oe-Kusi Ambeno (RAEOA).
Hafoin la hetan konfiansa husi governu Aliansa Mudansa ba Progresu (AMP) iha tinan 2018, Alkatiri komesa ataka tan Xanana hodi dehan sei hasai Xanana ninia mitu ne’e, Alkatiri hakarak dismistifika Xanana ho maneira oioin.
“Ha’u lahatene se maka karismátiku, no se maka la’os karismátiku. Ba ha’u persija intendimentu alargada ida, la’os ha’u ho Xanana, Xanana ho ha’u hotu ona (la iha tan ona relasaun),” hateten Alkatiri ba jornalista sira hafoin ba presta omenazen ba ahu-kdesan saudozu jornalista Max Sthal iha Benfica, Colmera-Dili, Kuarta, 15 Dezembru 2021.
Alkatiri hatutan, nia ho Xanana la’os Maromak.
"Ami na'in rua la'os Maromak, nia (Xanana) hanoin nia Maromak, ha'u la hanoin ha'u Maromak," afirma Alkatiri.
Alkatiri kontinua ezije atu lider sira tenke iha konsensu hodi bele rezolve krize politika iha rai-laran, maibé atu halo konsensu oinsa baihira loron-kalan maka akuza hela de’it Xanana iha ninia konta media sosial.
"Ami lider 74-75, no 83 ninian Lere sira no 1987 ninian. Ami na'in sanulu tenki tu'ur hamutuk no halo intendimentu alargadu, agora balun dehan Mari ho Xanana tenki tu'ur hamutuk ne'e la iha, ne'e sei la akontese."
Deklarasaun Alkatiriu ne’e kontrariu no hamosu konfujaun ba adeptu politika sira tantu husi FRETILIN no CNRT, tanba nia dehan entre nia ho Xanana laiha hotu ona, laiha ona relasaun saida de’it, maibé iha parte ida ne’e Alkatiri dehan, nia ko'alia ho onestu de'it katak, nia la iha ona intensaun ida atu hado'ok malu ka fahe malu beibeik, nune'e antes tama eleisaun jeral tenki iha ona konsensu entre lider sira hodi hadi'a situasaun politika ne'ebe akontese iha rai doben ne'e.
"Ha'u hanoin 2022-2023 ita la iha (hanoin) fahe malu do'ok liutan, ne'e ha'u ko'alia onestamente. Tanba ne'e, antes eleisaun 2023 tenki iha (nahe) biti boot ida ba ami na'in sanulu tenki tu'ur hamutuk, la'os ha'u ho Xanana de'it," Alkatiri fila lia.
