DILI (TOP) – Maske Prezidente partidu FRETILIN atual Prezidente Repúblika, Francisco Guterres Lú Olo to’o oras ne’e seidauk dekreta loron ba eleisaun prezidensial nian, maibé ekipa susesu kandidatu balun oras ne’e hahu la’o maka’as tama-sai knua no suku sira iha teritóriu nasionál hodi halibur kartau eleitoral atu bele rezista sira nia kandidatura iha eleisaun prezidensial tuir mai.
Tuir informasaun balun ne’ebé The Oe-Kusi Post (TOP) asesu, ekipa susesu kandidatu balun oras ne’e hahu la’o maka’as ona iha munisipiu Bobonaro, no Oe-Kusi Ambeno hodi halibuar kartaun eleitoral, maibé habosok eleitor sira katak, kandidatu ne’e maka hetan fiar ona husi atual Prezidente partidu CNRT, Maun Boot Kay Rala Xanana Gusmão maske Xanana rasik durante ne’e sempre ko’alia bebeik ona katak, CNRT sei desidi ninia kandidatura ne’e liu husi konferensia partidu nian.
Presidente Conselho Diretiva Nacional-(CDN) partidu CNRT, Dionísio da Costa Babo Soares afirma, partidu CNRT to’o oras ne’e seidauk desidi ninia kandidatura.
“Maun Boot Xanana nu’udar Prezidente partidu dehan bebeik ona katak, CNRT sei desidi ninia kandidatura ne’e liu husi konferensia partidu. To’o agora CNRT seidauk desidi nia kandidatu,” katak Dionísio Babo via kontaktu telemvél ba The Oe-Kusi Post (TOP), Segunda, 03 Janeiru 2022.
Mosu mós kriteria balun iha kubu CNRT nia laran rasik ne’ebé iha tendensia sei “kontradiz” ho kriteria sira ne’ebé sei fó sai iha rezultadu konferensia partidu nian. Kriteria balun ne’ebé oras mosu ona maka:
- Tenki kuadru partidu CNRT
- Koñesimentu di’ak ba polítika externa
- Koñesimentu politika interna/nasionál
- Abilidade iha lian ofisial ho estranjeira
- Ka’er metin prinsipiu partidu CNRT no ezekuta politika partidu nian
- Komunga PEDN
- Lealdade ba partidu
- Prontu atu hatur fali orden konstitusional iha fatin
- Prontu hatur hikas orden Estado demokrátiku iha fatin, no seluk tan.
Kriteria ne’e mosu husi kuadru partidu CNRT nian balun de’it, la’os mosu husi rezultadu konferensia partidu nian.
Prezidente Partidu FRETILIN atual Prezidente Repúblika, Francisco Guterres antes ne’e iha loron 12 Novembru 2021, deklara ona nia intensaun atu re-kandidata aan bainhira povu hakarak, no konferensista sira husi partidu FRETILIN iha munisipiu Baukau iha loron 04 Dezembru 2021 ho lian ida husu ba lideransa partidu, hodi pronunsia ona atual Presidente República Francisco Guterres Lú Olo atu RE-KANDIDATA.
Iha Konferensia, konfresista sira husi postu administrativo 6 hili Kamarada Abrão Oliveira sai nudar koordenador Komisaun Polítika Munisípal ba periodu tinan lima.
Xefe Estadu Maior Jenerál FALINTIL-Forsa Defeza Timor-Leste (F-FDTL), Tenente Jenerál Lere Anan Timur mós deklara ona ninia intensaun hodi kandiata nia aan iha eleisaun prezidensial ne’e, maibé iha munisipiu Baukau, Sekretariu Jeral Partidu FRETILIN, Mari Bim Amude Alkatiri kontinua akuza Kay Rala Xanana Gusmão katak, Xanana maka hakarak atu hasai Lere Anan Timur husi forsa armada hodi kandidata aan maske Lere rasik maka hakarak kandidata aan.
Kandidatu seluk maka Virgilio Guterres atual Prezidente Konsellu Imprensa Timor-Leste ne’ebé independente, maibé iha ninia baze politika mai husi rede RENETIL no Partidu Demokratiku balun inklui mos FRETILIN balun.
Mosu mós kandidatu feto rua, Milena Pires eis reprezentante espesial Timor-Leste ba ONU no atual Vise-Primeiru Ministru, Armanda Berta dos Santos husi partidu KHUNTO.
Iha mós kandidatu ida nu’udar eis padre ida maka Martinho Gusmão, no iha posibilidade boot partidu CNRT liu husi nia konferensia sei apoiu laureadu nobel ba paz 1996, José Ramos Horta, maibé dala ida tan rezultadu konferensia partidu nian maka sei deisidi iha tempu badak.
Maske partidu CNRT seidauk desidi ninia figura kandidatu ba eleisaun prezidensial, maibé faktu balun hatudu, antes ne’e Prezidente partidu CNRT, Kay Rala Xanana Gusmão suporta ona Ramos Horta sai ona Prezidente Repúblika iha loron 20 Maiu 2007 to’o loron 20 Maiu 2012, no durante asaun karitativa iha tinan 2020, entre Xanana ho Horta ne’e sempre la’o hamutuk no ko’alia mamar ba malu ho hamnasa itoan-itoan.
