Empreza SAMHEE Construction “duni sai” trabalhador nain 11 iha Ambeno

SANTA ROSA (TOP) – Empreza Internasional SAMHEE Contruction Co.Ltd ne’ebé halo projetu konstrusaun edifisiu administrasaun Rejiaun Administrativu Espesial Oe-Kusi Ambeno (RAEOA) tenke “duni sai” tiha traballador nain 11 husi serbisu fatin ho razaun volume serbisu mak hahu menus ona.

Karta terminasaun serbisu ne’ebé The Oe-Kusi Post (TOP) asesu, Site Manager agradese tebes ba traballador sira nia kooperasaun durante ne’e, tanba ho sira nia kolaborasaun mak volume serbisu iha projetu ne’e hahu menu dadauk ona, no kompañia mós promete sei halo pagamentu ba salariu fulan jullu nian no mós ho indemnizasaun (PHK) tuir kontratu lei traballu nian. Karta terminasaun ne’e asinatura husi Site manajer SAMHEE Contruction Co.Ltd, Youngwon Yoo.

Desijaun hamenus númeru traballador ne’e halo traballador balun sente la kontente, tanba desijaun ne’e mai ho derepente de’it.

“Ohin ami mai atu servis, maibé mai to’o ne’e sira entrega karta terminasaun ne’e dehan osan laiha atu selu ami, ne’e ami nain 11 ami tenke para serbisu ohin kedas, maibé kontratu sei la’o hela,” hateten traballador ida ne’ebé lakohi públika nia identidade, tanba kestaun seguransa serbisu ba The Oe-Kusi Post iha Santa Rosa, Oe-Kusi Ambeno, Sábadu 18 Jullu 2020.

Traballador ne’e hatutan, durante ne’e trabalhador sira serbisu la’o di’ak no laiha xamada atensaun, to’o derepenti de’it hapara onba sira.

“Durante ami serbisu la halo problema ida, tanba ami hatene serbisu ho displina, ne’ebé ho desizaun ami senti triste tanba lakon serbisu ida ne’e,” nia afirma.

Entretantu, Diretor Obras Públika RAEOA, Kandido dos Reis Amaral katak nia seidauk iha koñesimentu kona-ba problema hapara traballador sira ne’e.

“Ha’u foin mak rona informasaun ne’e hapara ema nain 11, ida ne’e bele akontese tanba hare ba serbisu menus ona ka la hatene razaun ruma, maibé ha’u sei konfirma tok ho SAMHEE ema sira ne’e hapara tanba saida, ha’u sei bolu sira osan mak laiha ka ho razaun seluk ligadu ho serbisu obra nian,” esplika diretór Kandido.

Tuir kontratu dahuluk katak projetu ne’e tenke remata ona iha tinan 2018, infelizmente to’o oras ne’e seidauk hotu hela de’it, foin mak atinje 35%. Projetu ne’e hahu iha loron 1 Fevereiru 2017 ho valor kontratu US$ 10,900,035,37 ba durasaun fulan 18 nian, maibé nia durasaun ne’e liu tiha ona, no extende tan kontratu ba dala tolu ona mós sedauk hotu hela de’it.

Entreantu, antes ne'e iha loron Tersa 23 Juñu 2020, Prezidente Autoridade ba Rejiaun Administrativu Espesial Oe-Kusi Ambeno (RAEOA), no Zona Espesial ba Ekonomia Sosial Merkadu (ZEESM), Arsenio Paixão Bano vizita ona konstrusaun edifisiu administrasaun ne’ebé seidauk hotu hela de’it.

Notisia relevante: Bano vizita konstrusaun edifisiu administrasaun RAEOA

"Loron daruak ha’u tama serbisu rona no hare, buka hatene serbisu uluk ha’u sei iha autoridade tenki buka tuir hatene ne’e mak ohin ba hare edifisiu administrasaun foin mak 35%, tanba ne’e ita fo semangat ba sira para halo nafatin,” hateten Prezidente Autoridade RAEOA, Arsenio Paixão Bano ba The Oe-Kusi Post hafoin remata nia vizita ikus iha klinika São Damião iha bairu Numbei Oe-Kusi Ambeno, Tersa 23 Juñu 2020.

Bano esplika, nia vizita ba fatin sira ne’e importante, tanba edifisiu administrasaun ne’e sei sai ijemplu ida tanba, edifisiu ne’e sei akomoda funsionáriu besik 500.

“Ha’u la fiar tinan ida ne’e hotu, maibé tenki hotu, tanba edifisiu ne’eba mós atu moderniza ita nia servisu ba povu Oe-Kusi, karik ema boot ida mai vizita diresaun ruma nia la persiza halai tun-sa’e atu buka direktur sira,” esplika Bano.

Abilio Elo Nini
Author: Abilio Elo NiniWebsite: www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Reporter
Reporter base in Ambeno, Oecusse.

PUBLISIDADE

Online Counter