SANTA – ROSA (TOP) – Problema boot lubuk ida mak oras ne’e husik hela iha Rejiaun Administrativu Espesial Oe-Kusi Ambeno (RAEOA), tanba ne’e emprezariu Ambeno oan sira husu ba Prezidente Autoridade katak molok atu hatutan projetu boot sira ne’e tenke involve mós sira.
Prezidente Kamara Komersiu no Industria RAEOA (KKI-RAEOA), Eurico Darosa husu ba Prezidente RAEOA katak molok atu kontinua projetu boot sira iha Oe-Kusi Ambeno tenke involve mós setor privadu sira iha prosesu dezenvolvimentu Oe-Kusi Ambeno.
Nia hatutan, atu involve emprezariu lokal sira ne’e nu’udar lasu amizade entre autoridade ho emprezariu lokal sira hodi nune’e bele relasaun mutual iha setor dezenvolvimentu ekonomia iha rai-ketan ne’e.
Nia esplika, Oe-Kusi Ambeno lahanesan ho munisipiu sira seluk, tanba kuaje sasan nesesidade báziku hatama barak liu husi nasaun viziñu Indonézia, tanba ne’e presija tebes tratamentu ida dignu husi autoridade ba emprezariu lokal sira, tanba importador sira mós durante ne’e fó kontribuisaun maka’as ba taxa iha Oe-Kusi Ambeno.
“Ami espera prezensa autoridade nian bele apoiu no fasilita setor privado nian, tanba ami hanesan setor privadu importa sasan halo kooperasaun di’ak ho nasaun seluk, entaun parte relevante sira iha rai-laran presija identifika no halo tratamentu di’ak para aktividade la’o ho susesu,” Prezidente KKI RAEOA ne’e hato’o nia intervensaun liu husi surumutu ho Prezidente Autoridade RAEOA iha Oe-Kusi Ambeno, Sesta 17 Jullu 2020.
Nia mós sujere ba, autoridade presija halo politika ida, tanba iha tempu pasadu bainhira grande projetu sira la’o, involvimentu emprezariu lokal ladun másimu.
“Ida ne’e ami konsidera katak importante tebes ba autoridade foun atu tau hanoin ona, karik ba oin bele dignifika emprezariu lokal sira, tanba bainhira emprezariu lokal ida partisipa nia hetan osan, nia halo buat ruma iha rai Oe-Kusi Ambeno,” nia sujere.
Nune’e mós emprezariu Marcos Colo Neno husu ba autoridade Oe-Kusi Ambeno katak, bainhira atu halo tan estrada sira liga ba sub-rejiaun sira tenke hanoin atu involve ona emprezariu lokal sira atu nune’e sirkulasaun osan ne’e bele akontese iha rai-laran.
“Hakarak ita nia ekonomia forte governu tenke promove ona emprezario lokal sira, tanba ami hanesan emprezariu lokal iha osan sei investe iha Oe-Kusi Ambeno,” nia rekomenda.
Emprezariu Bartolomeu Rakama Eke Sequeira mós sujere atu halo kondisaun ba emprezario lokal sira kona-ba fundus nian.
“Ha’u hanoin ba oin ita komesa dudu ona investimentu lokal domestik nian, hanesan ami emprezariu balu ka’er projetu iha modal itoan, maibé ba maluk sira ne’ebé iha hanoin hakark investe, maibé modal laiha ida ne’e ita husu se bele autoridade tau netik osan itoan iha banku para emprezariu no komunidade bele impresta fali osan ne’e ho nia funan, ida ne’e parte ida atu hamoris ekonomia iha Oe-Kusi Ambeno,” Eke sujere.
Hatan ba rekomendasaun sira ne’e, Prezidente Autoridade ba RAEOA no ZEESM-TL, Arsenio Paixão Bano katak durante tinan lima kotuk la halo dialogu ho emprezariu lokal sira, no foin ba dala uluk iha tempu mak halo dialogu ne’e, no halo ona promesa ba emprezariu sira katak sei hametin liña koordendasaun kona-ba aktividade negósiu nian.
