AMBENO (TOP) – Rezultadu eleisaun prezidensial ronde dahuluk husi sentru votasaun Eskola Bázika Filiál (EBF) Masin, iha aldeia Sanane suku Costa sub-rejiaun Pante Makasar kandidatu Prezidente Repúblika Francisco Guterres Lú Olo hetan votu hamutuk 402 no kandidatu Horta hetan votu hamutuk 1042.
No rezultadu provizoriu eleisaun prezidensial ronde daruak ne’e hatudu kandidatu Horta hetan votu barak liu Lú Olo nian. Horta hetan votu validu hamutuk 1.119, no Lú Olo hetan de’it 452.
Rezultadu ne’e la balansu ho saida mak durante ne’e kamarada Arsenio Paixão Bano nu’udar Prezidente Autoridade ba Rejiaun Administrativu Espesial Oe-Kusi Ambeno ho nia aliadu sira halo esforsu durante ne’e iha Oe-Kusi Ambeno.
Durante ne’e halo serbisu maka’as atu lori kandidatura Prezidente Repúblika Francisco Guterre Lú Olo tenke manan maioria iha rai-ketan Oe-Kusi Ambeno, ikus mai folin la’ek tebes basa iha nia suku rasik de’it mós Lú Olo simu derota.
Esforsu Bano nian ho bosok oioin, bosok tun-sa’e durante ne’e lakonsege konvense povu Ambeno nia fuan-laran hodi vota ba kandidatu Lú Olo, maibé ninia esforsu ne’e atu hanesan loke dalan hodi “hakoi” no lori Lú Olo ba derota mak iha, tanba kandidatu PR Horta mak manan iha Bano nia aldeia laran ho total votu 1.119, no kandidatu Lu Olo hetan de’it votu hamutuk 452.
Kamarada Bano atual eis vise-prezidente partidu FRETILIN ne'e mai husi aldeia Sanane, suku Costa, sub-rejiaun Pante Makassar, Oe-Kusi Ambeno.
Iha sentru Masin, iha estasaun votu 2, ho rezultadu provizóriu kandidatu númeru sorteiu 1 José Ramos Horta, manan ho votu 1.119,no kandidatu númeru sorteiu 2, Fransisco Guteres Lú Olo ho votu 452, hosi totál votu válidu 1.571, votu nulu haat (4) no votu branku lima (5).
Rezultadu finál apuramentu iha sentru votasaun Eskola Bázika Filiál (EBF) Masin, kandidatu númeru sorteiu 1 mak manan ho votu 1.119, daruak kandidatu Fransisco Guteres Lú Olo ho votu 452, ho totál votu válidu 1.571.
Totál eleitór ne’ebé rejistu iha sentru votasaun EBF Masin hamutuk 1.580 kompostu husi mane nain 823, no feto nain 757.
Apuramente iha sentru votasaun EBF Masin hahú iha tuku 4:00 lororaik remata iha tuku 19:00, ne’ebé hetan seguransa másima hosi PNTL, observa hosi Comisaun Nasionál Eleisaun (CNE, sigla portugés), no akompaña direita hosi fiskál kandidatura na’in-16.
Nune’e mós iha prosesu votasaun ne’e la’o ho transparánsia tanba brigadista mak responsabél ba prosesu tomak, maibé hetan seguransa másima hosi Polísia Nasionál Timor-Leste (PNTL).
Nune’e mós hetan observasaun hodi Comisaun Nasionál Eleisaun (CNE) no observadór internasionál husi Uniaun Europeia (UE) no hetan akompaña direita husi fiskál kandidatura na’in-rua nian.
Dadus husi STAE totál eleitór ne’ebé partisipa iha eleisaun prezidensiál 19 abríl 2022, iha RAEOA hamutuk 51.495 komposta hosi mane 26.232 feto 25.263, ho totál, sentru votasaun 60 no estasaun votu hamutuk 88, ne’ebé envolve brigadista na’in-60 no poling staf na’in-880.
