AMBENO (TOP) – Iha tinan 2015, Parlamentu Nasionál (PN) aprova osan lubuk ida ba Oe-Kusi Ambeno hodi implementa projetu pilotu Zona Espesial ba Ekonomia no Sosial Merkadu (ZEESM) iha Rejiaun Administrativu Espesial Oe-Kusi Ambeno (RAEOA).
Ho implementasaun projetu pilotu ZEESM ne’e ho esperansa ida, projetu pilotu ne’e bele sai nu’udar modelu dezenvolvimentu iha nasaun tomak, infelizmente edifisiu ba veteranu sira iha rai-ketan ne’e durante tinan barak sai abandonadu to’o ohin loron, tanba ladun hetan atensaun masimu hahu husi jestor ZEESM atual eis Primeiru-Ministru, Mari Alkatiri to’o nia kamarada Arsenio Paixão Bano atual Prezidente Autoridade ba RAEOA.
The Oe-Kusi Post (TOP) observa, Arsenio Bano ho nia liman-ain sira durante ne’e okupadu tebes ba projetu sira ne’ebé iha tendensia atu hariku de’it militante partidu politiku no familia balun, maibé haluhan tiha hodi hadia tiha edifisiu veteranu sira nian ne’ebé ninia distansia ladun do’ok husi Ban onia serbisu fatin lorloron iha Oe-Kusi Ambeno.
Ho situasaun ne’e, Konsellu Veteranu RAEOA, Martino da Cunha rekoñese uma ne’e entrega husi Prezidente Autoridade, Arsenio Bano iha tempu hirak liuba ho nia kondisaun a’at tebes.
Tanba kondisaun edifisiu ne’e la di’ak, nune’e Konsellu Veteranu RAEOA durante ne’e hato’o ona pedidu ba Bano hodi hadia netik, maibé pedidu ne’e ba para fali iha Sekretariu Rejional ba assuntu Terras Propriedade nia liman ne’ebé tuir loloos la merese atu akontese hanesan ne’e.
“Ami tenta atu hasoru ita nia Prezidente Autoridade RAEOA, maibé nia laiha tempu atu hasoru malu, ho nune’e ami haruka de’it karta-oan ida ba autoridade, depois nia pespaixu tun fila-fali ba Sekretariu Rejional ba asuntu Terras Propriedade,” hatete Martinho da Cunha ba TOP iha Oe-Kusi Ambeno, Tersa 12 Outubru 2021.
“ Nia fó fatin duni, hatudu uma oan ida mai ami, uma ne’e besik hela kampu desportivu nia-oin kedas, maibé to’o ne’eba ami hare uma ne’e nia kondisaun la di’ak, odamatan, eletrisidade laiha, janela. meza, kadeira, be’e moos laiha, buat hotu laiha,” Martino da Cunha afirma.
Nia sita total total veteranu (klandestina) iha RAEOA hamutuk 3961 husi suku 18, no konsege verifika ona hamutuk nain 2600.
“Sira seluk seidauk, tanba ladun asesu ba informasaun, maibé sira sei ba verifika iha Dili, tanba prosesu verifikasaun iha Oe-Kusi Ambeno remata tiha ona” nia esplika.
Nia hatutan, tanba edifisiu ne’ebé entrega husi Arsenio Bano ne’e la di’ak, maka durante prosesu verifikasaun ba veteranu sira iha Oe-Kusi Ambeno uja de’it (Martinho da Cunha) nia uma privadu de’it.
Nia sente triste tebes ho modelu atendimentu husi Arsenio Bano ba veteranu sira iha Oe-Kusi Ambeno.
Antes ne’e, molok atu halo konstrusaun ba aeroportu internasional rota do sandalo ne’ebé nia didin ne’e to’o oras ne’e sei uja kalen, Alkatiri mós desidi hodi harahun tiha osuariu (fatin) hakoi veteranu sira iha Oe-Kusi Ambeno. Iha tempu ne’eba, Alkatiri promete sei buka fatin foun hodi konstroi hikas osuariu ne’e, maibé faktu hatudu to’o oras ne’e seidauk halo.
TOP durante ne’e sempre halo kontaktu ho Prezidente Autoridade RAEOA, Arsenio Paixão Bano hodi konfirma kona-ba assuntu barak inklui edifisiu a’at ne’e, maibé dala barak nia la atende, no resposta ikus ne’ebé nia fó ba TOP maka nia sei lakohi ko’alia ho TOP.
