AMBENO (TOP) – Movimentu Oe-Kusi Apoiu Maun Boot Ray Rala Xanana Gusmão asina komprimisiu eleitoral ho koordenador partidu CNRT Oe-Kusi Ambeno.
Portavoz Movimentu Oe-Kusi Apoiu Maun boot Kay Rala Xanana Gusmão (MOA-X), Agustinho da Costa katak, MOA-X mai hamutuk ho partidu CNRT iha Oe-Kusi Ambeno atu tau forsa politika hamutuk lori vitoria ba Maun boot Kay Rala Xanana Gusmão atu nune’e bele kaer nafatin ukun hodi hasai povu husi ki’ak no mukit.
"Agradese ba estrutura partido CNRT iha Timor-Leste no RAEOA. Movimentu ida ne’e eziste, tanba hare ba impase politika hahu kedas husi tinan 2017 to’o ohin loron, halo povu Timor Leste sai vitima husi ukun nain autoritariu sira. Tanba ne’e maka ami mosu hodi serbisu hamutuk atu lori Maun Boot fila ba ukun iha tinan 2023,” hateten Agustinho da Costa liu husi konferensia ba imprensa iha sede partidu CNRT iha Numbei, Oe-Kusi Ambeno iha loron Sabadu 11 Setembru 2021.
Nia hatutan, membru MOA-X ne’e mai husi PLP, KHUNTO, FRETILIN-Mudansa, no FRETILIN rasik ne’ebé hakarak Maun Boot Xanana tenke fila ba ukun iha tinan 2023.
"Ho hanoin no vizaun ida katak, Maun Boot Kay Rala Xanana Gusmão maka bele lori rai ida ne’e ba prosperu”.
Nia dehan, kompromisiu ne’ebé MOA-X halo ho CNRT Oe-Kusi Ambeno ne’e la’os atu hadau estrutura CNRT nia fatin ka la’os atu buka interese ruma, maibé kompromisiu ne’e atu hatudu katak, ema mai husi partidu politika oioin maka hakarak Maun Boot tenke fila ba ukun iha tinan 2023 ba oin.
Iha fatin hanesan, Koordenador CNRT Oe-Kusi Ambeno, Firmino Taeki agradese tebes ba MOA-X ne’ebé mós durante ne’e sente ona katak, só Maun Boot duni maka bele lori rai ne’e ba oin.