DILI (TOP) — Autoridade ba Rejiaun Administrativu Espesial Oe-Kusi Ambeno (RAEOA) transporta ona Ambeno-oan sira hamutuk nain 115 husi Dili ba Oe-Kusi Ambeno iha Sesta oras tuku ida kalan boot.
Prosesu transporta ema hirak ne’e ba dala rua ona, no sei iha ema barak maka oras ne’e sei kontinua hela iha Dili laran.
Maske nune’e, tuir portavoz movimentu Ambeno-oan sira, Zecafriado F. Coa konsidera lala’ok atendimentu autoridade RAEOA ba nia povu sira iha Dili laran dezumanu tebes, tanba iha Kinta dadersan kedas autoridade RAEOA kontaktu ona ema hirak ne’e hodi ba hein ro SUCCESS iha portu Dili, no ikus mai tenke hein fali to’o Sesta 18 Juñu 2021 oras tuku ida kalan boot maka ro ne’e foin sai husi Dili ba Oe-Kusi Ambeno.
“Tanba agora situasaun kalan hanesan ne’e, ami atu ba haan iha ne’ebé? Kuitadu ohin xefe gabinete maka kontaktu ba komunidade sira ne’e, manifesta nia inkapasidade kontaktu dehan mai hotu. Dadauk ne’e sira mai ona pontikais komesa tuku 8:35 dadersan to’o tuku 01:05 kalan maka foin kompañia responde tula pasajeiru sira ho gratuitamente,” haktuir portavós Zecafriado F. Coa ba jornalista sira iha portu Dili Kinta 17 Juñu 2021.
“Ha’u hakarak hatete ba públiku ho sentimentu tristeza mesmu iha ona desizaun serteza, ami espera katak kompañia ho laran luak bele transporta ami nia komunidade sira ba RAEOA. Ami sei reza para bele tulun kompañia na’in ne’e tanba ajuda ona Ambeno-oan hamutuk 115 maka transporta ona ba RAEOA".
“Ami honestu katak ami hetan viola husi Prezidente Autoridade RAEOA tanba inresponsabilidade ba ambeno oan sira ne’ebé maka agora iha kapitál Dili, tanba em primeiru lugar sira ne’ebé maka transporta ona ba ha’u hanoin kala prezidente autoridade nia esforsu tanba nu’udar prezidente RAEOA, tenke ko’alia no tenke buka solusaun ba komunidade sira ne’ebé maka dadauk ne’e esforsu sidade Dili”.
“Ami agradese ba kompañia ida ne’ebé maka aluga ró SUCCESS ne’e, ami halo ona diplomasia ho kompañia ne’e katak orsida bele transporta Ambeno-oan hamutuk 115 ba RAEOA, tanba ami nia prezidente RAEOA agora laiha ona. Sei iha mós hanesan de’it tanba nia povu ne’ebé maka mai eskola no mai buka moris iha kapitál Dili laiha responsabilidade para bele atende, tanba kompañia ne’e maka selu, la’os Prezidente Autoridade”.
Zecafriado dehen, sei reprezentante RAEOA mai iha ne’e mós estudante sei duni nia fila tanba nia agora laiha tiha ona kompetensia hodi responsabilidade ba ambeno oan sira hodi autoriza ro komunika ho kompañia nain. Tanba nia laiha kapasidade tanba nia la komunika ho kompañia nain no operador ro SUCCESS ne’e.
Tuir kompañia Branditall, coordinator development business Arpar Catela hateten nu’udar kompañia presija buka lukru bainhira kompañia aluga ró SUCCESS tula projetu Cesta Bázika sira ne’e ba RAEOA, sasan sira ne’e tula hotu tiha lai, maka foin ko’alia fali buat seluk.
“Agora kolega sira balun sira mai katak tenke tula ami nia ema ida ne’ebá la di’ak iha ne’ebá di’ak bele tula más ami nia sasan sira ne’e seidauk tama hotu ba ró laran ne’e,” Arpar Catela esplika.
“Ha’u mos familia sira hanesan hotu ita nia maluk sira dadauk iha portaun ne’e dalaruma hanesan Timor oan sente ladiak duni mas bainhira ha’u hamrik hanesan kompañia ne’ebé maka aluga ro labele”.
Maibé negosiasaun portavoz ho kompañia ne’e infelismente to’o ikus kordenador development business kontaku kedas ba nia patraun hetan rezultadu katak bele fasilita Ambeno-oan sira ba RAEOA ho gratuitamente laos prezidente autoridade ho Gabinete RAEOA maka komunika buka solusaun ba ambeno oan sira ne’e.
Entretantu kordenador gabinete RAEOA ZEEMS fárol Dili, Nilton Rodrigues Pereira dehan, públiku hatene katak ohin loron tenke transporta Ambeno-oan sira ba RAEOA.
“Ita hotu hatene katak ohin atu transporta ita nia ema sira ba RAEOA maibé ita mos tenke hatene katak kompañia ne’ebé maka aluga ro ne’e, tenke tula nia sasan sesta bazika uluk hotu maka ita nia ema sira bele sa’e,” nia hateten.
