Bano kontinua ‘budu’ Ambeno-oan nain 862 iha Dili laran

DILI (TOP) — Prezidente Autoridade ba Rejiaun Administrativu Espesial Oe-Kusi Ambeno (RAEOA), Arsenio Paixão Bano kontinua ‘budu’ hela Ambeno-oan hamutuk nain 862 iha Dili laran, tanba seidauk transporta sira ba Oe-Kusi Ambeno.

Hafoin Ambeno-oan lubuk ida desidi hodi okupa rezidensia ofisial RAEOA-ZEESM-TL iha Farol, Dili iha tempu hirak liuba, ikus mai Bano konsege desidi hodi transporta nain 80-de’it maka ba ona, maibé nain 800 resin maka oras ne’e sei abandonadu hela iha Dili.

Notisia relevante: Nain 80 de’it maka ba ona nain 800 sei abandonadu iha Dili

Bano sempre argumaneta katak, seidauk bele transporta ema hirak ne’e hotu ho rajaun, fatin kuarentena iha RAEOA maka la sufisiente.

Ho kestaun ne’e, reprezentante povu iha uma fukun Parlamentu Naisonal, deputada Lucia Taeki ejize Prezidente Autoridade ba Rejiaun Adminsitrativu Espesial Oe-Kusi Ambeno (RAEOA) Arsenio Paixão Bano atu transposta estudante sira no inan-aman sira hamutuk nain 862 ne’ebé maka to’o oras ne’e sei iha hela Dili laran.

“Ha’u hakarak husu liu-liu labarik sira seidauk transporta sira ba RAEOA, tanba autoridade RAEOA hamutuk ho estudante sira ka maluk sira ne’ebé maka buka moris iha sidade Dili. Sira halo tiha ona akordu katak kada semana rua ró tenke transporta sira, maibé iha semana rua liu-bá transporta ona 80 hela ema nain 862 maka sei iha Dili,” deputada Lucia Taeki levanta kestaun ne’e iha Parlamentu Nasionál, Dili, Segunda 14 Juñu 2021.

Taeki hatutan, liga mós ba alin sira ne’ebé momentu ne’ebá tuir teste Swab primeiru hamutuk ema na’in 14 maka hetan positivu ba surtu Covid-19 no horseik sira sai ona husi sala izolamentu Tasi-tolu, ho nune’e sira tenke halo ona orariu para sira bele transporta ona ba RAEOA.

“Ha’u nu’udar reprezentante Oe-Kusi oan nafatin  atu husu ba governu atu halo liña koordenasaun di’ak, bainhira transporta estudante ka inan aman sira karik tenke uza ró ahi SUCCESS ha’u lakohi Ró ahi Transit II tanba iha semana kotuk ba tiha Atauro tula Primeiru Minstru Taur Matan Ruak ho membru governu balun maka ba iha Atauro Ró ne’e atraka de’it labele".

“Ita haree katak Ataruro ne’e besik tebes ho durasaun la’o oras rua de’it, ita hanoin took ba Oe-Kusi ho durasaun oras 8 ka 10 ne’ebá maka la’o ne’e oinsa,  la’o tan iha kalan no akontese tan buat ruma iha tasi klaran ha’u lakohi ida ne’e, tanba tula povu barak. ró ne’e bainhira nia ba RAEOA parese la to’o tan Maubara iha de’it Tasi-tolu nia baku fila ona”.

“Ho ida ne’e maka ha’u husu ba governu sentral tanba ha’u nu’udar reprezentante povu Oe-Kusi ha’u lakohi atu akontese buat ruma bainhira tula pasajeiru sira ba RAEOA tanba bainhira atu ba RAEOA la’os tula ema ida ka rua de’it. Maibé ema atus-ba atus. Sei akontese duni responsavel saida maka ita boot sira responsavel”.

Taeki dehan, nia fó hanoin de’it ba governu sentral hodi servisu hamutuk ho prezidente RAEOA, analiza didi’ak keta fo sala nakoda dehan nakoda foun. Nia hanoin ró sira ita aluga ne’e ro sira mai ne’e foun duni. Nakoda ne’e foun duni la’os de’it Timor oan maka lori ro sira ne’e,  tenke haree didi’ak buka hatene tanba saida maka ró ne’e sai hanesan ne’e.

Hatan ba kestaun ne’e, Minstru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo dehan, sei ko’alia kona-ba ró ne’e, no sei hato’o mós assuntu ne’e iha nivel reuniaun Konsellu Ministru sira.

“Ha’u hanoin ha’u mós hato’o ona ba Konsellu Ministru sira nia kompetensia atu haree loos duni saida maka akontese iha sesta feira, iha ilha Atauro ne’e mós lamentavel tanba kapitaun ro TRANSHIP II maka la di’ak ka kapitaun maka laiha esperiensia ita la hatene”.

“Ita sei halo investigasaun tanba saida maka ró ne’e atu ba Atauro atraka de’it presiza tempu naruk tebes to’o ikus atraka mos kleuk hela tan, situasaun ne’e ema hotu akompaña no hatene, asuntu ne’e orsida hau sei hato’o ba iha parte kompatente,” nia hateten.

Marcelino Bata
Author: Marcelino BataWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Jornalista
Jornalista TOP. Bandu atu simu envelope ka sasan ruma husi fonte informasaun sira.

PUBLISIDADE

Online Counter