AMBENO (TOP) – Sidadaun kuarentena hamutuk na’in 44 ne’ebé viajen husi Dili-Oe-kusi iha loron 31 Maiu 2021 kontenti iha fatin kuarentena laran, tanba ohin kompleta ona loron 14 iha prijaun kuarentena laran, infelizmente autoridade Rejiaun Administrativu Oe-Kusi Ambeno (RAEOA) seidauk husik sira sai husi kuarentena laran ho rajaun la klaru.
Tuir informasaun balun ne’ebé The Oe-Kusi Post (TOP) asesu husi sidadaun sira iha kuarantena laran katak, konteudu regulamentu ne’ebé fó sai husi Prezidente Autoridade ne’ebe taka iha kuarentena sira iha Oe-Kusi Ambeno iha pontu 18, no iha pontu 8 katak, “bainhira pasajeiru ne’ebé kumpri ona loron 14, sira fila ba uma tenki halo dezinfekta sira nia sasan hotu” maibé, regulamentu ne’e rasik la realiza.
Pasajeiru sira nain 44 ne’e molok termina kuarentena sira kumpri ona hasai swab-nose test iha loron Sesta 11 Juñu 2021, no rezultadu sira rona iha domingo 13 Juñu 2021 katak 100% rezultadu negativu.
“Tuir loloos ohin ami tenke sai ona, tanba ami tama kuarentena iha loron 01Juñu 2021 bazeia ba regulamentu sira ne’e, maibé iha ohin dader ne’e molok atu konsulta iha responsavel médiku sira katak, seidauk bele sai sei hein desizaun husi autoridade,” katak sidadaun kuarentena ida via kontaktu telemovel ba TOP Segunda 14 Juñu 2021.
Hafoin mosu barullu itoan iha kuartena laran liu oras balun de’it, autoridade haruka komandante PNTL Pante Makasar ba ameasa sidadaun nain 44 iha kuarentena katak, “se maka koko atu sai koko-ba depois maka polisia hare imi, hakarak ba toba iha sela ka hakarak hetan pankada,” sidadaun kuarentena ne’e hasara lia-fuan ne’ebé komandante PNTL ne’e hatete ba sira iha kuarentena Mahata, Oe-Kusi Ambeno.
Tuir karta eskrita ne’ebé TOP asesu iha Segunda ne’e katak, asinatura aprovasaun regulamentu ne’e husi Prezidente Autoridade RAEOA, Arsenio Paixão Bano hanesan mós Prezidente Komisaun Prevensaun no Mitigasaun Covid-19 RAEOA, fó sai regulamentu sira ne’e, liu husi karta eskrita hodi taka ba kada kuarentena no fatin públiku balun atu nune’e ema hotu bele asesu ho pontu hamutuk 18 mak hanesan tuir mai ne’e:
- Husu Pasajeiru hotu tenki kumpri karantina no auto-karantina durante loron 14, mesmu mai ho misaun servisu ne’ebé mak importante.
- Husu ba pasajeiru tama iha karantina no auto-karantina laran tenki uza máskra.
- husu ba pasajeiru hot-hotu tenki hakmatek iha ida-idak nia fatin ka kuarto laran.
- Bainhira tama iha karantina no auto-karantina labele tur halibur hamutuk no ida-idak iha nia kuarto laran.
- Pasajeiru ida ou rua ka liu, bainhira rezultadu Swab-Nose positivu Covid-19 iha karantina no auto-karantina, pasajeiru hot-hotu sei re-karantina ou re-auto-karantina durante loron 5 hodi hasai fila-fila Swab-Nose.
- Pasajeiru ne’ebé mak positivu covid-19, sei evakua kedas ba sala izolamentu iha 12 óras nia laran.
- Bazéa ba mata-dalan Organizasaun Saúde Mundiál (OMS), no saúde Timor Leste, katak bainhira to’o loron 10 iha karantina no auto-karantina hotu-hotu sei hasai Swab-Nost obrigatoriu.
- Bainhira pasajeiru ne’ebé kumpri loron 14, sira atu fila ba uma tenki halo dezinfekta ba sira sasan hotu.
- Laiha fleksivilidade ba pesoál ne’ebé mai ho misaun servisu exceptu iha lia mate.
- Pasajeiru hotu ne’ebé tama mai-liu hosi dalan legal ka ilegál no hosi Dili mai através ho ró marítima no aviaun, atu hetan evakuasaun ba karantina uza kareta privado lori rasik no uza kareta Covid-19 tur iha kotuk.
- La-autóriza família ka kualker ema atu mai vizíta iha aréa karantina laran.
- Pasajeiru hotu-hotu iha karantina lá autóriza atu joga karta, dansa, no loke múzika.
- La autóriza família lori sasán hanesan, rice-cooker, buli-chook, bikan, kanuru, kopu atu lá lori tama ba karantina laran.
- Autóriza ba família sira atu lori sasán sanitasaun hanesan, sabaun, sampo, pastadente, eskova nehán, rinsó, maibé sei fó tuir pesoál saúde sira ne’ebé mak hein iha karantina no auto-karantina.
- Pesoal saúde sei fahe hahán iha ida-idak nia odamatan oin, lá persiza atu hadau malu.
- Labele so’e fo’er arbiru iha area karantina no auto-karantina laran, tenki soe foer iha lixu fatin.
- Pasajeiru labele fó kualker sasán ba família iha liur.
- Fó hanoin katak, bainhira tama karantina, pesoál saúde no PNTL sei hela hamutuk ho pasajeiru iha karantina durante loron 14 nia laran.
Ikus mai tuir informasaun balun ne’ebé TOP asesu katak, autoridade RAEOA planeia ona atu liberta ema hirak ne’e iha loron Tersa 15 Juñu 2021.
