DILI (TOP)— Estudante no komunidade sira husi Rejiaun Administrativu Espesiál Oe-Kusi Ambeno (RAEOA), ne’ebé hela iha kapitál Dili konsidera Koordenadór Gabinete ZEESM eh liman-ain Prezidente Autoridade ba Rejiaun Administrativu Espesial Oe-Kusi Ambeno, Nilton Pereira bosok ten tanba utiliza nia pozisaun hodi viola akordu ne’ebé antes ne’e deside hodi transporta Ambeno-oan sira ba Oe-Kusi Abeno kada semana, maibé to’o oras ne’e seidauk akontese no seidauk realiza.
Zecafriado Coa, nu’udar portavós maske antes ne’e la sai ona hanesan responsavel ba abitante Oe-Kusi Ambeno ne’ebé hela iha Dili, tanba hafoin sira deside hodi okupa rezidénsia ZEESM iha Faról-Dili no sai hanesan responsavel, portavós hodi ezije ba Prezidente Autoridade RAEOA, Arsenio Paixão Bano transporta sira ba rai moris fatin.
Ejizénsia ne’e hetan duni ninia rezultadu hafoin sira okupa no halo PA RAEOA ulun moras, hodi hakotu prosesu ne’e tomak maka PA RAEOA liu husi Koordenadór Gabinete ZEESM, husu ba portavós komunidade sira ne’e prepara lista ema sira ne’ebé atu ba, ho nune’e portavós sira prepara no entrega konsege fasilita abitante etapa dahuluk tantu estudante no komunidade hamutuk na’in 80 maka ba ona Oe-Kusi Ambeno, no autoridade promete ona atu kada semana tenke transporta komunidade hirak ne’e tuir akordu ne’ebé iha ona. Maibé, realidade hatudu besik fulan ida ona mós parte autoridade seidauk kumpri promesa ne’e hodi transporta komunidade sira ba Oe-Kusi Ambeno.
“Bazeia ba komprimisu ami estudante no komunidade ne’ebé hakarak fila ba Oe-Kusi Ambeno ho pilar 3 Sentru Integradu Jestaun Kríze, liu husi akordu ida katak sei transporta ema kada etapa no tuir lista ne’ebé maka ami prepara. To’o oras ne’e seidauk akontese,” portavós Zecafriado Coa hateten ba jornalista sira iha Faról-Dili, Segunda 14 Juñu 2021.
Nia hatutan, diskriminasaun ne’ebé komete hosi Koordenadór Gabinete ZEESM halo ba sira hanesan loos ida ne’ebé maka antes ne’e halo husi Prezidente Autoridade RAEOA hodi transporta de’it ninia militante FRETILIN sira ho aviaun ZEESM, maibé husi povu ki’ik sira kontinua abandonadu iha Dili laran.
“Ohin akontese ne’e iha ami nia matan laran de’it (ami nia oin), lista ne’ebé ami prepara ema hamutuk 187 atu bolu maibé, realidade la bolu (la simu) ami nia lista. Bolu (simu de’it) de’it nia família ne’ebé kontaktu de’it hosi telefone, ne’e diskriminasaun sériu ne’ebé presiza estadu Timor Lorosa’e tau atensaun.”
Nia mós dehan promesa ne’ebé parte PA RAEOA liuhosi koordenadór Gabinete ZEESM promete sei transporta ema tuir etapa ne’e falsu.
“Sira promete kada semana sei transporta maibé, realidade semana tolu tiha ona seidauk transporta ema ida. Ami prepara tiha lista fó tiha ba sira la bolu maibé bolu de’it ema ne’ebé sira koñese.”
“Ami sei marka prezensa iha Portu Dili kuarta ou kinta komesa dadeer to’o ró transporta ba Oekusi, kuandu la transporta ba Oekusi maka ami sei halo assaun hodi blokeia totalmente ró labele ba. Sé nia (Koordenadór ZEESM Nilton Perreira) mak iha ne’ebá mós ami kesi tiha,” nia ameasa.
Entretantu, Nilton rejeita akuzasaun Zecafriado nian hodi dehan nia simu hotu lista sira ne’ebé apresenta ba nia.
“Lista ne’ebé mak hosi kolega (Zecafriado Coa) sira fó no sira ne’ebé ba alista iha gabinete, ha’u nia staff sira iha ne’ebá atende hotu. Kona-ba informasaun dehan ha’u simu lista hosi ema seluk ne’e la’e, ha’u nia staff sira tau konsiderasaun ba parte rua ne’e hotu hodi bele transporta sira fila ba Oekusi,” nia hateten.
