DILI (TOP) — Ema nain 80 maka ikus mai desloka ona husi Dili ba Rejiaun Administrativu Espesial Oe-Kusi Ambeno (RAEOA), maibé sei iha ema nain 800 resin maka oras ne’e kontinua abandonadu no sei kontinua okupa gabinete RAEOA-ZEESM-TL iha Farol, Dili, tanba durante ne’e moris susar tebes iha Dili laran.
Ho situasaun ne’e, deputada CNRT, Lucia Taeki husu ba governu sentral no Prezidente Autoridade ba RAEOA, Arsenio Paixão Bano atu kontinua buka solusaun ba Ambeno-oan sira nain 800 ne’ebé sei kontinua toba iha edifisiu RAEOA-ZEEMS Farol, Dili.
“Hanesan reprezentante povu Oe-Kusi Ambeno ejize nafatin ba governu sentral no autoridade RAEOA kona-ba transporte maritima ne’ebé maka ohin dadersan ha’u liu husi portu Dili, ró SUCCESS maka tula pasajeiru nain 80 husi Dili ba Oe-Kusi Ambeno, maibé sei iha nafatin nain 800 resin ne’ebé sira sei hela iha autoridade RAEOA-ZEESM Farol,” deputada Lucia Taeki levanta kestaun ne’e iha plenaria Parlamentu Nasionál, Dili Segunda 31 Maiu 2021.
“Ho ida ne’e hau husu nafatin ba governu sentral no autoridade RAEOA buka dalan hodi buka transporta maritima atu tula Ambeno-oan sira ne’ebé maka sei hela iha gabinete RAEOA-ZEESM Farol, Dili. Ha’u ajize ba autoridade RAEOA no governu sentral tanba sira toba durante semana ida ona iha ne’ebá”.
Nia hatutan, Ambeno-oan sira kompri ona regra Organizasaun Mudial Saúde (OMS) no Minsiteriu Saúde tanba iha ema nain 80 ne’ebé maka sira halo ona teste swab ema nain 14 maka kumpri iha izolamentu Tasi-Tolu no ema nain 66 maka livre husi Covid-19.
“Tanba saida maka ha’u ejize hanesan ne’e tanba hanesan Oe-Kusi oan ita hatene katak sira mai iha sidade Dili hodi buka sira nia moris rasik iha Dili tanba sira hetan baku, sira atu husu transporte maritima mós la autoriza la hatene tanba saida, sira tur iha uma mós se maka atu responsavel hodi atende sira nia nesesidade lor-loron,” nia husu.
Pasajeiru sira husi Dili ba RAEOA./Net.
Iha parte seluk, Prezidente Autoridade Portuariu Timor-Leste (APORTIL), Flavio Cardoso Neves katak, nia simu karta pedidu husi RAEOA atu transporta de’it ema nain 80 husi Dili ba Oe-Kusi Ambeno.
“Tanba ida ne’e, APORTIL sei koordena ho saúde Sentru integradu jestaun Krize (SIJK) tanba dadauk ne’e iha hela situasaun serka sanitaria, konfinamentu obrigatoriu nia laran, ita bele halo koordenasaun di’ak ba sidadaun sira ne’ebé depois maka ita bele fasilita ita nia Ambeno-oan sira ba fali sira nia moris fatin”.
“Ha’u here sira halo ona teste Covid-19 ba sira, rezultadu di’ak hotu, ita mos organiza orariu fixu ba ró ahi kada semana halai dala ida, hanesan ba iha ilha atauro no RAEOA, depois iha nesesidade urjente APORTIL koopera ho instituisaun sira seluk hodi bele fasilita pasajeiru sira ne’ebé maka atu ba RAEOA no ilha ATAURO,” katak Flavio Cardoso Neves ba jornalista sira iha edifisiu APORTIL, Dili, Segunda 31 Maiu 2021.
“Ha’u hanoin APORTIL ho Diresaun Nasionál Transporte Maritima, serbisu hamutuk ho transporte komunikasaun atu halo koordenasaun di’ak husi parte SIJK bele hetan solusaun ida ne’ebé maka di’ak depois maka bele fasilita sidadaun sira ba sira nia fatin,” afirma Flavio.
Author: Marcelino BataWebsite:https://www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
Jornalista
Jornalista TOP.
Bandu atu simu envelope ka sasan ruma husi fonte informasaun sira.
