ZUMALAI (TOP) – Impaktu husi implementasaun Estadu emerjénsia durante fulan tolu iha rai-laran lori problema barak liu ba família kbi’it la’ek sira, tanba sira labele halo movimentu hodi sustenta sira nia a’an, maibé komunidade balun iha munisipiu Bobonaro no Kovalima hetan ona tulun balun husi emprezariu Silverio Maubere.
Hafoin akompaña asaun karitativa ne’ebé hala’o husi eis Komandante em Chefe das FALINTIL, Kay Rala Xanana Gusmão ne’ebé besik fulan tolu ona iha rai-laran konsege hamamar emprezariu Kovalima oan ne’e nia odamatan fuan nakloke luan tebes hodi tulun no lolo liman ba nia maluk kbi’it la’ek sira balun tantu iha munisipiu Bobonaro no Kovalima.
Hare husi aspetu politika, emprezariu Silverio Maubere nia ideolojia politika diferente tebes ho Kay Rala Xanana Gusmão nian, tanba Silverio mai husi partidu FRETILIN, maibé hare ba problema pandemia Covid-19 ne’ebé la haree ba koor partidu politika, emprezariu ne’ebé mai husi postu Zumalai, Kovalima ne’e ikus mai desidi apoiu foos saka 700 resin hodi apoiu ba ferik-katuas sira ne’ebé vulnerabel tebes ba fatin balun iha munisipiu Bobonaro, no balun iha munisipiu Kovalima.
Vizita Xanana ba munisipiu Bobonaro no Kovalima hetan apoiu maka’as husi emprezariu Timor-oan lubuk ida hanesan, Tony Lopes, Rui Lopes apoiu fasilidade prevensaun Covid-19 ba Unidade Patrulla Fronteira iha área fronteira nian hahu husi Bobonaro tama to’o Kovalima, apoiu mós nesesidade báziku ba família kbi’it la’ek sira tantu iha Bobonaro no Kovalima.
Kari domin, kuda dame, hakerek istoria terus husi 1975-1999 iha aldeia ida-idak nian, rejista ferik-katuas sira ho tinan 60 ba leten, no kontinua prevene aan husi moras Covid-19 sai nu’udar tópiku sentral ne’ebé Kay Rala Xanana Gusmão hato’o ba komunidade sira iha fatin sira ne’ebé nia visita ba iha teritóriu nasionál durante ne’e.
