VATUBORO (TOP) – Suku Hadomi Inan no Oan (SHIO) iha suku Vatuboro, Likisa deklara sai independente ona hodi prontu atu organiza mesak atividades saúde inan no oan hamutuk ho lideransa komunitarian iha nivel suku nian.
Iha loron Segunda, 27 fulan Jullu 2020, ekipa Fundasaun Alola hakat ba suku Vatuboro hodi fó graduasaun ba grupu SHIO iha suku ne’e.
SHIO nu’udar rede serbisu iha nivel suku nian iha kna’ar importante atu promove inisiativa maternidade segura ne’ebé integradu ho programa saúde sira seluk hanesan promosaun susubeen inan no hahan komplementár, promosaun kuidadu ba bebe foin moris no planeiamentu familiar.
Prosesu graduasaun ba grupu SHIO ida ne’e marka fase importante ida ba Fundasaun Alola, no mós membru grupu sira tanba liu husi seremonia ida ne’e simbolikamente katak grupu sira ne’e prontu ona atu organiza mesak atividades saude inan no oan hamutuk ho lideransa komunitarian iha nivel suku nian.
“Iha autoridade lokal nia oin, ami membru grupu Suku Hadomi Inan no Oan husi Suku Vatuboro ho laran tomak deklara katak hahu husi loron ohin ami hanesan grupu SHIO independente ona husi suku Vatuboro no hamutuk ho komunidade suku Vatuboro esforsu atu hasae direitu no dignidade inan no labarik sira iha suku ida ne’e”, deklara membru grupu SHIO husi suku Vatuboro, iha loron Segunda, 27 Jullu 2020 iha sede suku Vatuboro ne’ebé The Oe-Kusi Post (TOP) asesu husi Alola Media iha pájina ofisial Facebook Fundasaun Alola.
Rekezitus barak grupu SHIO sira tenke prense antes hetan graduasaun maka hanesan tenke hatudu resultadu pozitivu liga ba atividade promove inisiativa maternidade seguru, promove fó-susubeen inan eskluzivu, nomos promove praktika uza ai-han lokal ne’ebe nakonu ho nutrisaun hodi fo han ba bebe sira fulan 6 ba leten.
Durante seremonia graduasaun, Fundasaun Alola, reprezentante kompanha SANTOS no Autoridade Lokal entrega ofisialmente apoio fundus kiik inklui material sira seluk hanesan cofre atu rai osan no livru ba grupu SHIO ho objetivu atu utiliza ba atividade mikrokriditu. Antes ne’e, membru grupu SHIO sira hetan ona kapasitasaun kona-ba mikrokriditu no finanseiru baziku ne’ebe fornese husi ekipa programa Hakbiit Ekonomia Feto – Alola nian.
Parabens ba Grupu SHIO (Suku Hadomi Inan no Oan) husi Suku Vatuboro, Postu Administrativu Maubara, Munisipiu Liquica ne'ebé iha loron 27 Jullu hetan ona graduasaun. Espera katak komitmentu ne'ebe durante ne'e iha atu bele hasae estatutu saude inan no oan iha komunidade bele buras nafatin no ikus bele haforte ita nia futuru jerasaun sai forte liu-tan.
Fundasaun Alola nu’udar organizasaun feto ida fo ona ninia dedikasaun hodi kontribui ba mudansa estatutu feto Timor-Leste nian inklui mos iha area saude inan no oan nian. Dezenha no implementasaun programa ba area refere iha nível nasionál nomós área rurál hanesan estratejia ida ne’ebe Alola konsidera atu promove feto nia direitu.
Estabelese iha tinan 2003, liu husi harii Asosiasaun Klibur Susubeen Inan, programa SIO-Alola hetan tan misaun foun ida iha tinan 2006 hodi promove Inisiativu Maternidade Seguru, Espasu Hahoris, Atendimentu Bebé Foin-moris no prátika Alimentasaun ba Labarik no Infantil (IYCF). Atu promove inisiativa maternidade seguru iha nivel komunidade, iha tinan 2007 Alola ofisialmente lansa projetu Suku Hadomi Inan no Oan (SHIO).
Hahu husi tinan 2007 to’o agora, Fundasaun Alola liu husi tulun kompanha ConocoPhillips ne'ebe hetan aklzisaun husi kompanha SANTOS nomos ChildFund Timor-Leste hatudu ona ninia komitmentu hodi apoio programa saude inan no oan iha Munisipiu Liquica. Agora, programa SHIO kobre ona suku hotu hamutuk 24, husi numeru ida ne’e suku 16 hetan suporta husi kompanha ConocoPhillips no suku 8 suporta husi ChildFund Timor-Leste.
