FATUMEA (TOP) – Nain ba kompañia Rebafa Mean Mane nu’udar Fatumea-oan fahe ona foos saka 313 ba família kbi’it la’ek sira iha postu Fatumea.
Geografikamente, postu Fatumea do’ok tebes husi kapital munisipiu Kovalima, no suku no aldeia barak besik tebes ho teritóriu Indonézia nian. Nune’e, eis Komandante em Chefe das FALINTIL, Kay Rala Xanana Gusmão husu ba komunidade sira ne’ebé hela besik iha área fronteira ne’e atu labele la’o ba-mai iha área fronteira, tanba iha Indonézia (Atambua) rasik moras Covid-19 sei iha hela.
Antes ne’e mós kompañia ne’e kontribui foos saka lubuk ida hodi fahe ba komunidade kbi’it la’ek sira iha Tasi-Tolu iha tempu hirak liuba.
Xanana apela ba komunidade sira ne’ebé hela besik área fronteira katak, labele la’o ba-mai fronteira, tanba nasaun viziñu oras ne’e moras Covid-19 sei iha hela.
“Ha’u husu ba joven sira atu labele uja jalan tikus hodi la’o ba-mai iha área fronteira, tanba ita nia nasaun viziñu oras ne’e Covid-19 sei iha hela. Husu mós ba ferik-katuas sira bainhira hetan ema ruma tama mai liu husi dalan ilegal tenke informa lalais ba autoridade segurança hodi ba ka’er lori ba hatama iha kuarentena,” hateten Xanana ba komunidade sira iha Fatumea, Tersa 28 Jullu 2020.
Xanana konsidera parte positivu ida husi moras Covid-19 mak konsege hamosu sentimento solidariedade, sentimentu domin ba malu entre Timor-oan sira ih arai-laran.
“Tanba asaun karidade ne’e la’os uja ha’u nia osan mak sosa sasan sira ne’e, maibé ida ne’e mai husi Fatumea-oan rasik mak sosa, no sente katak nia hakarak ajuda sira ne’ebé presija liu. Covid-19 nia di’ak mak hamosu sentimentu solidariedade entre Timor-oan sira ih arai-laran”.
