SASATAN OAN (TOP) – Antes ne’e eis Primeiru-Ministru atual Sekretariu Jeral partidu FRETILIN Mari Bim Amude Alkatiri soe lia (halo piadas) iha plata forma media sosial hasoru asaun karidade eis Komandante em Chefe das FALINTIL, Kay Rala Xanana Gusmão nian durante ne’e katak uja osan restu korupsaun nian mak halo, maibé José Lobato hare katak asaun ne’e ho intensaun di’ak, tanba pelu-menus ajuda netik familia kbi’it la’ek sira durante.
"Ha’u sinseramente dehan hanesan ne’e, iha intensaun ka la ho intensaun ha’u lahatene. Iha intensaun ka la ho intensaun, ha’u dehan di’ak. Ha’u membru partidu ida ne’ebé lahanesan ho Avo Nana, ne’e imi hotu hatene, maibé mós ba ha’u se politiku sira seluk sente katak asaun karidade ida ne’e iha intensaun seluk, ba ha’u tenke kompete positivamente,” hateten oan mane mesak saudozu Prezidente Repúblika Nicolau dos Reis Lobato, José Lobato ba jornalista sira iha Sasatan Oan, Soibada, Domingu 5 Jullu 2020.
“Se sente ida ne’e halo ho intensaun seluk, entaun ita boot sira mós halo buat ruma ne’ebé fó benefisiu ba povu,” José Lobato sujere no rekomenda ba lider partidu sira seluk mós bele halo asaun karidade hodi ajuda povu sira ne’ebé presija duni tulun.
Antes ne’e mós Bispo Diocese Maliana, Don Norberto do Amaral konsidera asaun karidade ne’ebé hala’o husi Kay Rala Xanana Gusmão iha rai-laran nu’udar dalan ida atu sa’e ba lalehan, no husu ba sidadaun sira labele politiza asaun karidade ne’e.
