SASATAN OAN – Familia Lobato iha Leorema (Likisa), no Soibada (Manatuto) balun durante ne’e iha hanoin la hanesan ho Eis Komandante em Chefe das FALINTIL, Kay Rala Xanana Gusmão nian iha aspetu balun, maibé oras ne’e sira rekoñese katak sorte boot Xanana moris hela mak reorganiza hikas funu ne’e ho nia maluk funu nain sira seluk mak konsege halo Timor-Leste hetan nia independensia.
Hanoin la hanesan ne’e hatudu liu husi saudozu Prezidente Repúblika, Nicolau dos Reis Lobato nia oan mane mesak, José Lobato monu ain no husu ona deskulpa ba Kay Rala Xanana Gusmão iha saudozu Nicolau Lobato nia moris fatin iha Sasatan Oan, Soibada iha loron Sábadu 4 Jullu 2020.
Prezensa Kay Rala Xanana Gusmão iha Soibada, Manatuto iha loron Sábadu 4 Jullu iha oras tuku 6 lorokraik. Molok hakat to’o Soibada, Kay Rala Xanana Gusmão ho nia ekipa tenke deskansa oras balun iha mota Soibada, tanba mota tun, no rezulta kareta ida ne’ebé tula jornalista sira tenke mate iha mota klaran bainhira hakur mota ne’e, no kareta ne’e mós nia makina la moris hodi lori fali ba Dili iha loron Domingu 5 Jullu 2020.
Bainhira to’o Soibada, komunidade sira, liliu familia saudozu Prezidente Repúblika, Nicolau Lobato nian simu Xanana ho haklalak, haksolok, simu ho tebe tradisional rai Soibada nian no hakilar viva ba Xanana no Nicolau Lobato. Simu tiha iha pontu entrada Soibada, familia Lobato sira lori Xanana ba hatudu iha saudozu Nicolau Lobato nia moris fatin iha Sasatan Oan, Soibada.
Iha fatin ne’e, tiun, no oan mane Nicolau Lobato nian haktuir istoria moris Nicolau Lobato ba Xanana. Iha fatin ne’e mós José Lobato monu ain no husu deskulpa ba Xanana.
Entretantu, iha Domingo dadersan, komunidade sira iha Soibada akompaña Kay Rala Xanana Gusmão ho José Lobato iha igreja Soibada. Hafoin misa, padre selebrante hato’o agradese no obrigadu ba Xanana nia ajuda ba igreja Soibada nian iha tinan hirak ba kotuk. No, Konsellu Pastoral igreja Soibada mós aproveita tempu hodi bolu Xanana no José Lobato sai ba hamrik iha altar oin hodi tara tais ba sira.
Hafoin tara tais, Xanana ho José hakuak malu no huu rentos ba malu iha altar lulik nia oin nu’udar jestu fó perdaun ba malu, hahu hadia hikas sira nia relasaun ne’ebé durante tinan barak nia laran lahanesan.
“Prepara aan didi’ak para kompete iha futuru,” hateten Xanana ba José Lobato bainhira hakuak malu iha altar lulik igreja Soibada, Domingu 5 Jullu 2020.
Hafoin sai misa, José Lobato dehan sira nain-rua sente isin kaman hotu bainhira hakuak malu no nia husu deskulpa ba Xanana.
"Ha’u sente ami nain-rua sente isin kaman karik. La’os ha’u de’it, maibé ami nain-rua sente isin kaman. Ha’u hanoin ida ne’e mak importante. Dalaruma iha naksalak ruma, ha’u prefere ko’alia oin ba oin,” José Lobato hateten ba jornalista sira iha Sasatan Oan, Soibada, Domingu 5 Jullu 2020.
Nicolau Lobato moris iha loron 24 Maiu 1946 iha Sasatan Oan, Ai-Tara Hun, Soibada, munisipiu Manatuto, no militar Indonézia sira oho mate iha loron 31 Dezembru 1978, iha foho Mindelo.
Hafoin Prezidente FRETILIN Nicolau Lobato mate tiha, iha fulan Dezembru tinan 1978, hamutuk ho Membru Komité Sentrál barak FRETILIN nian, Kay Rala Xanana Gusmão, simu knar hodi organiza hikas fali luta. Iha fulan Marsu, tinan 1981, organiza Konferénsia Nasionál FRETILIN nian ba dala uluk, durante ne’e, foti nia nu’udar líder Rezisténsia no Komandante-Xefe FALENTIL nian (Forsa Armada Libertasaun Nasionál Timor-Leste).
Husi tempu ne’eba, Xanana halo estratejia oioin, no rezultadu ikus mai Timor-Leste manan funu kontra Indonézia, no hetan ukun rasik aan to’o ohin loron.
