SANANAIN (TOP) – Eis Komandante em Chefe das FALINTIL, Kay Rala Xanana Gusmão katak, molok hala’o ataka ba baze militar Indonézia ida iha Manatuto, ba dala uluk nia ho komandante sira seluk ba simu bua ho malus iha Sananain.
Xanana haktuir, iha fulan Marsu tinan 1976, nia hamutuk ho komandante balun iha Kribas, balun husi Laklo ba halo enkontru ida iha Sananain hodi halo estratejia no planu atu oinsa bele lansa ataka ida ba Manatuto.
“Atan oan iha tempu ne’eba nu’udar komandante peletaun Marabain. Kuaje tinan 40 ona mak ha’u foin mai. Ida ne’e ha’u sei lembra. Husi ne’e mak ba to’o Manufahi ne’eba. To’o Manatuto, ema duni fali ami halai to’o labele,” Xanana haktuir nia istoria badak ne’e molok fahe nesesidade báziku ba kbi’it la’ek sira iha Sananain, Manatuto, Sesta 3 Jullu 2020.
Xanana hatutan, iha tempu ne’eba grupu tolu mak ba atu asalta Manatuto. Grupu Xanana nian tama husi natar ida besik semintériu dalan atu ba Laleia, grupu ida husi estrada boot atual, no ema hare hetan sira mak hahu tiru sira.
“Ami n ia grupu ne’e ladun hetan”.
Maske nune’e, Xanana husu ba joven sira iha Sananain no joven hotu iha rai-laran atu respeita ferik-katuas sira, tanba ho sira nia sakrifisiu, susar no terus durante tinan 24 mak ikus mai halo Timor-Leste hetan independensia.
“Ita la manan funu ho kilat. Gerilla ne’e povu mak halo funu, la’os exerzitu rua mak kontra malu. Iha tinan 1999 ferik-katuas sira determinadu tebes ba tuu mak hodi ita hetan ukun aan,” Xanana esplika.
Xanana dehan, ferik-katuas sira ne’ebé ohin loron sei moris ne’e, reprezenta sira ne’ebé mate uluk liu ona, no Estadu sei deve hela sira. Tanba ne’e, nia husu ba Estadu tenke tau matan ba ferik-katuas sira hodi halo kaman netik sira nia moris lorloron molok sira husik hela mundu ne’e.
Entretantu, komunidade sira informa ba Xanana katak durante tempu rezistensia nia laran, sira moris iha presaun nia laran, tanba de’it fatin Sananain ne’e identiku ho Xanana nia naran rasik.
