BAUKAU (TOP) — Kandidatu Partidu Frente Revolusináriu Timor Lorosa’e Independente (FRETILIN) Francisco Guterres Lú Olo hateten, nia sente haksolok tebes tanba konsege halakon kandidatu númeru sorteiu 14 José Manuel Ramos Horta ne’ebé tau foto prezidente Partidu Congresso Nasionál Reconstrução Timorense (CNRT) Kay Rala Xanana Gusmão iha eleisaun ronde dahuluk iha munisipiu Baukau.
“Ha’u dehan ida ne’e ho onra boot teb-tebes tanba ha’u bele manan kedas iha primeira ronda, manan lider boot na’in-rua ne’ebé mak tau hamutuk sira nia foto iha bulletin de votu ida Xanana Gusmão, ida José Manuel Ramos Horta, ha’u manan sira na’in rua iha munisípiu Baukau,” Lú Olo hateten liu-husi diálogu iha salaun sentru konvensaun Baukau, kota Barru, Postu Administrativu Baukau Vila, Munisípiu Baukau, Kinta 07 Abril 2022.
Prezidente partidu FRETILIN ne’e konta, maske kandidatu José Manuel Ramos Horta manan iha munisipiu sira seluk maibé iha munisipiu sira seluk mós Lú Olo nia votu mós iha nafatin hamutuk ho munisipiu Baukau no Vikéké.
“Kandidatu Lú Olo nia votu mós iha nafatin iha segundu primeira volta hakat tan ho kandidatu José Manuel Ramos Horta ba segunda volta. Ha’u fiar metin ba povu Baukau em partikularmente ba Buibere no Maubere sira juventude sira iha Baukau ne’e, iha eleisaun segundu volta iha Baukau ha’u mai konfirma de’it ha’u nia vitória ba segundu ronde ida ne’e,” nia hateten.
“Ha’u atu hatete mós ba Baukau oan sira atu ita hotu tenke matan mós neon-nain nafatin tanba ba iha eleisaun iha segunda volta ne’e. Eleisaun ida ke importante tebes hili Prezidente Repúblika ida ba prezidente povu tomak, ka hili prezidente repúblika ida ne’ebé para atu sobu fali ba orgaun soberania sira,” nia hateten.
Iha fatin hanesan koordenador partidu FRETILIN munisipiu Baukau, Abrão de Oliveira hateten, munisipiu Baukau prontu fó vitoria dala ida tan ba eleisaun segundu volta ba kandidatu Lú Olo.
Nia hatutan, militante no apoiante sira iha munisipiu ne’e, sei fó vitória dala-ida tán ba kandidatu PR Francisco Guterres Lú Olo hodi re-eleitu ba prezidente repúblika periodu tinan 2022 to’o 2027.
“Ha’u em nome kamarada sira hotu, belun sira hotu, kompañeiru sira hotu iha ne’e, Ami Baucau hato’o katak, prontu fó vitória dala-ida ita tán ba kamarada prezidente Lú Olo”.
Nia hatutan, nia hanoin nia parte la ko’alia barak ida ne’e iha kandidatu Lú Olo nia knuuk Lú Olo nia fatin, garante vitória ba segundu mandatu prezidente repúblika. Kamarada Francisco Guterres Lú Olo.
The Oe-Kusi Post (TOP) observa iha terenu katak, kampaña eleitorál ho modelu diálogu ne’e, partisipante kuaze ema nain 700 resin, hetan seguransa masimu husi membru PNTL nian, no superviziona direitamente husi ofisiál Komisaun Nasionál (CNE) nian.
