BALIBO (TOP) — Portavoz ba kandidatu Prezidente Repúblika Franscisco Guterres Lú Olo, Fernando Gusmão reclama, sidadaun sira ne’ebé la tuir no la konsege tuir votasaun iha sentru votasaun paralelu sira iha munisipiu Dili ne’e maioria husi kandidatu Lú Olo nian.
Eis deputadu husi Partidu Sosial Demokrata (PSD) ne’e hatutan, nu’udar ekipa susesu kandidatura Francisco Guterres Lú Olo sente lamenta tebes ba situasaun no akontesimentu sira iha sentru paralelu Dili nian, tanba barak mak tenke lakon sira nia direitu ba vota.
“Tanba ami bele hateten katak sidadaun sira ne’ebé maka la konsege vota ne’e barak liu mai husi apoante númeru sorteiu 6 nian ne’ebé maka lakon sira nia direitu de votu tanba sira kontaktu direita mai ami,” Portavoz kandidatu Lú Olo, Fernando Gusmão ba jornalista sira, bainhira akompañia kontajén votu, iha sentru votasaun sede suku Balibo, Postu Adminsitrativu Balibo Vila Munisipiu Bobonaro, Sábadu 19 Marsu 2022.
Portavoz Lú Olo ne’e husu ba CNE no STAE para ba futuru atensaun di’ak tan tanba sira hare katak falta informasaun husi CNE no STAE liu-liu STAE sira la esplika deltalladu ba mekanismu atu rejistu iha sentru votasaun paralelu ne’e oinsa?
“Tanba informasaun ida ne’e la dun hato’o ba sidadaun sira, sidadaun sira hein too loron eleisaun maka sira foin lori kartaun eleitoral ba vota deit”.
Nia hatutan, maibé laiha regra ne’e dehan sidadaun mós tenke ba rejistu iha uluk STAE Dili kona-ba sira hakarak vota iha sentru votasaun paralelu hodi nune’e STAE prepara lista votante iha sentru votasaun paralelu sira nia naran iha STAE Munisipiu ne’e sei halakon.
“Informasaun tanba la to’o ita nia sidadaun sira hotu entaun ita nia sidadaun sira lakon direitu ida ne’e,” nia akresenta.
Nia rekomenda ba STAE no CNE aprende no presiza fó hanoin bebeik utiliza media estatal no privadu sira iha Timor Leste podia sosializa mekanismu votasaun sentru paralelu oinsa?
“Labele prezudika direitu sidadaun nian atu ezerse sira nia direitu de votu,” nia hakotu.
Iha parte seluk, rezultadu provizoriu apuramentu nasionál inklui rai-liur iha oras tuku 11:51 Domingu kalan hatudu, kandidatu PR José Manuel Ramos-Horta hetan votu barak liu 232,508 (45.74%), no tuir fali mak kandidatu PR Francisco Guterres Lú Olo ho total votu 114,277 (22.48%).
Total votu ba kandidatu hirak ne’e sei iha mudansa, tanba prosesu apuramentu oras ne’e sei kontinua la’o hela iha Sekretariadu Tékniku ba Administrasaun Eleitorál (STAE) nasionál.
