ERMERA (TOP) — Konselleiru masimu partidu Kmanek Haburas Unidade Nasionál Timor Oan (KHUNTO) José do Santos Bucar promete kandidatu Prezidente Repúblika Armanda Berta do Santos bainhira eleitu ba prezidente Repúblika sei lori Timor Leste (TL) sai husi nakukun ba naroman.
José Bucar ne’e esplika, ohin sira na’in rua mai Ermera hatais metan ho nia sentidu katak husi nakukun ba naroman kuandu iha naroman hanesan noi (feto) oan sira hatais faru matak hotu iha manu ida tau iha bandeira KHUNTO nian ne’e katak iha naroman.
Tuir pajina partido Kmanek Haburas Unidade Nasionál Timor Oan ne’ebé The Oe-Kusi Post (TOP) asesu husi live Konselleiru Masimu partidu KHUNTO hala’o kampaña ba dala hitu iha Gleno Ermera, Tersa 08 Marsu 2022.
“Fó naroman maka lori Timor Leste ba dezemvolvimentu hasai Timor Leste husi nakukun,” José do Santos Bucar hateten iha komisíu Politika ba kampaña kandidatu Prezidente Repúblika Armanda Berta do Santo ba dahitu, iha Gleno Munisipiu Ermera, Tersa 08 Marsu 2022.
José Bucar hatutan, loron ne’e to’o ona ba buibere foho ida ho uma lisan ba tur iha Prezidensiá Repúblika. Tanba ne’e duni mai husi tasi laran, aviaun, no husi ne’ebe de’it tenke mai husi uma lisan ruma.
“Ita nia inan sira kuandu tur ahi, tenke tau ahi matan ba besik sira ne’e. Ohin loron ita atu vota ba ita nia inan ida, buibere foho ida, se kuandu atu tur ahi sira nia matan, sira nia liman ba ahi matan ne’e hodi labarik bele sai boot to’o ukun rai ida ne’e”.
Nia esplika, kandidatu Armanda Berta dos Santos iha tinan 2022 ba sai prezidente Repúlika atu reprezenta foho sira hotu. Maubere foho sira hotu iha rai Timor Leste liu-liu husi Munisipiu Ermera ida ne’e.
“Dona Armanda Berta do santos ho númeru sorteiu 9 lori ita sira hotu hodi ba fiar iha maromak ida de’it dia 19 Marsu 2022. Keta haluha Ida ba maromak numeru sorteiu 9 ba uma lisan Buibere foho Armanda Berta dos Santos”.
Iha fatin hanesan kandidatura Prezidente Repúblika, Armanda Berta do Santos promete sei nia eleitu ba Prezidente Repúblika (PR), sei tau programa prioridade ba Mál-Nutrisaun iha Timor Leste.
Armanda Berta dos Santos hatutan, sei povu fó fiar nia atu sai Prezidente Repúblika maka oinsa atu tau orsamentu bo’ot ba Mál Nutrisaun ne’ebé dadaun ne'e povu sofre hela iha Timor Leste.
“Rai no povu ida ne’e ha’u nian. Tanba ne’e ha’u sei fó hanoin iha Timor Leste mal-nutrisaun barak tebes liuhusi ita nia inan no labarik sira ita nia aman sira mós idade sa’e ba bebeik ona ita tau orsamentu boot ba sira, hau hare ida ne’e iha munisipiu hotu-hotu. Bainhira ha’u eleitu ba Prezidente Repúblika,” Armanda Berta do Santos promete liuhusi komisíu politika, kampaña ba dahitu, iha postu adminsitrativu Glenu, Munisipiu Ermera, Tersa 08 Marsu 2022.
Tuir ajenda kandidatura Armanda Berta dos Santos ho númeru sorteiu sia (9) ohin Tersa 08 Marsu 2022, realiza komisíu politika ba dahitu iha Postu Adminsitrativu Gleno Munisipiu Ermera. Aban Kuarta 09 Marsu sei hala’o fali komisíu politika iha Rejiaun Administrativu Espesiál Oe-Kusi Ambeno (RAEOA) ba daualu (8).
