DILI (TOP) – Media Indonézia lubuk ida fó sai katak grupu Organisasi Papua Merdeka (OPM) ka Organizasaun Papua ba independensia konsege tiru-mate komandante Badan Intelejen Negara (BIN) ka Ajênsia Intellijênsia Estadu iha loron Domingu 25 Abril 2021.
Xefe Ajênsia Intellijênsia Estadu, Brigadeiru Jeneral Gusti Putu Danny Nugraha Karya mate, tanba kona tiru iha ulun husi membru OPM sira.
Tuir reportajen husi www.tribunnews.com katak, nia kona tiru bainhira hala’o hela patrulla rútina iha área Dempet, Beoga, munisipiu Puncak iha oras tuku 15:50 lorokraik. Tuir planu, mate-isin Brigadeiru Jeneral Danny sei evakua husi fatin akontesimentu ba Mimika iha loron Segunda 26 Abril 2021. Matebian ne’e husi Bali, no assume kargu nu’udar xefe BIN Papua nian desde fulan Juñu 2020 hodi troka Maijor Jeneral Abdul Haris Napoleon.
Komandante Komando Militar Rejional XVII/Cendrawasih, Major Jeneral Ignatius Yogo Triyono konfirma insidente ne’e. Nia dehan to’o agora seidauk evakua mate-isin ne’e.
“Mate-isin sei iha hela Beoga, ami sei monitoriza hela, aban planeia atu evakua ona,” hateten Maijor Jeneral Ignatius ne’ebé TOP sira husi Kompas.
TOP mós vizita matebian ne’e nia konta Facebook ho naran Danny Gusti katak, loron ida antes mate, nia sei hasai video semo ba visita fatin operasaun iha Irian Jaya. Iha nia konta Facebook ne’e nota katak nia husi KOPASSUS, no uluk 1998 hala’o misaun iha Timor-Leste. Nia ferik-oan nia foto iha cover Facebook nee hasai iha Tasi-Tolu, Dili.
