DILI (TOP) - Timor-Leste sai nu’udar “Best of The Nations” ba kompetisaun kulinária iha WorldSkills ASEAN ba dala 14 iha Manila-Filipina.
Vise-PM fó Parabens ba ekipa no ba kompetidóra Ester Araújo Pinheiro, ne’ebé sai nu’udar “𝐁𝐞𝐬𝐭 𝐍𝐚𝐭𝐢𝐨𝐧 𝐀𝐰𝐚𝐫𝐝𝐢𝐧𝐠 𝐨𝐟 𝐓𝐢𝐦𝐨𝐫-𝐋𝐞𝐬𝐭𝐞,” ida ne’e sai hanesan motivasaun bo’ot ida ba imi no Timoroan hotu.
“Parabéns ba imi, no Timoroan sira hotu,” hateten Vise-Primeiru-Ministru no Ministru Koordenadór ba Assuntu Ekonómiku, Ministru Turizmu no Ambiente, Dato’ Seri Francisco Kalbuadi Lay hafoin hasoru malu ho ekipa delegasaun sira iha Faról-Dili, Segunda, 08 Setembru 2025.
Ekipa ne’ebé lidera husi Diretora Instituto Nacional de Desenvolvimento de Mão-de-Obra, Instituto Público (INDMO,IP), Isabel Fernandes de Lima, akompañadu husi Tékniku Espesialista INDMO,IP, expertu no kompetidór sira hasoru malu ho Vise-Primeiru-Ministru no Ministru Koordenadór ba Asuntu Ekonómiku, Ministru Turizmu no Ambiente, Dato’ Seri Francisco Kalbuadi Lay hodi hato’o agradesimentu ba apoiu tomak husi Vise-Primeiru-Ministru durante partisipasaun Timor-Leste nian iha kompetisaun WorldSkills ASEAN iha Filipina.
Diretora INDMO,I.P, Isabel Fernandes de Lima katak, kompetisaun WorldSkills ASEAN ne’e halo dala ida iha tinan rua nia laran. No Timor-Leste ba iha ne’eba tanba aprende lobuk ida husi sentru treinamentu sira ne’ebé akreditadu iha rai-laran no sira aprezenta sira-nia dezempeñu ho di’ak loos.
Timor-Leste hetan konvite husi worldskills ASEAN 2025, no ba dahuluk partisipa iha worldskills ASEAN ne’e.
Timor-Leste tuir kompetisaun ne’e lori kompetidór na’in tolu ba cooking, restaurant services no mós welding nian, ao mesmo tempu iha mós expertu juri sira, tanba Timoroan nain tolu mos envolve hanesan juri ba iha kompetisaun ne’e.
“Kompetisaun ne’e, Timor-Leste hetan valor ne’ebé a’as nune’e sira ne’ebé mak hanesan head of delegations, ami kuaze nasaun hamutuk 10, ami na’in hira vota ba iha kada nasaun ema ida, tantu husi Timor-Leste, Ester Araújo Pinheiro mak hetan hanesan Best of the nations," esplika Diretora INDMO, I.P.
Vensedora ba kompetisaun WorldSkills ASEAN 2025 iha parte kulinária, Ester Araújo Pinheiro, sente orgullu tanba reprezenta Timor-Leste partisipa iha kompetisaun ne’e.
“Ne’e aumenta tan ha’u-nia skills foun no mós ajuda ha’u atu iha kompetisaun tuir mai ha’u mós bele aprende liu tan no mós hadi’a ha’u-nia skill di’ak liu tan," esplika Ester.
Partisipasaun ida-ne'e koordena husi INDMO, I.P, no Timor-Leste partisipa iha kategoria abilidade tolu hanesan Cooking ho nia konkorente husi Sentru Treinamentu Vokasional Juventude-Comoro (Ester Araújo Pinheiro), Restaurant Service ho nia konkorente husi DIT (Nenilton André de Sousa) no Welding ka Soldadura husi Centro Nacional Emprego Formação Profissional–Tibar (Fidencio das Neves).
Timor-Leste nia partisipasaun ba dahuluk iha kompetisaun rejionál ida ne’e bele hametin lasu amizade entre nasaun sudeste aziátiku sira.
Kompetisaun ASEAN ne’e hala’o iha World Trade Centre Manila durante loron tolu, partisipa husi nasaun membru ASEAN sira.
Antes ne’e, Vise-Primeiru-Ministru no Ministru Koordenadór ba Asuntu Ekonómiku (MKAE), Ministru Turizmu no Ambiente (MTA), Dato’ Seri Francisco Kalbuadi Lay, iha loron 14 Agostu 2025, hala’o lansamentu ba kontijente Timor-Leste ba dahuluk tuir kompetisaun WorldSkills ASEAN ba dala 14 iha Manila-Filipina.
Lansamentu kontijente Timor-Leste ba tuir kompetisaun WorldSkills ASEAN ba dala 14 ne’e iha Auditoriu Ministériu Finansa, Aitarak-Laran, Dili, ne’ebé hetan partisipasaun husi Vise Ministra Asuntu ASEAN, Milena Rangel, Diretora INDIMO no delegasaun sira ne’e partisipa iha kompetisaun WorldSkills ASEAN 2025 hahú husi loron 25 to’o 30 Agostu 2025.
“Ohin, ita hotu iha ne’e atu selebra imi juventude sira nia susesu. Ita boot sira la’os de’it estudante, maibé ita boot sira mak Timor-Leste nia imajen. Ita boot sira mak ami nia embaixadór sira. Ita boot sira serbisu maka’as tebes, treinu ho dedikasaun, no hetan ita boot sira nia fatin hodi reprezenta ita-nia nasaun,” Vise-Primeiru-Ministru no Ministru Koordenadór ba Asuntu Ekonómiku (MKAE), Ministru Turizmu no Ambiente (MTA), Dato’ Seri Francisco Kalbuadi Lay hato’o deklarasaun ne’e liu husi nia diskursu iha lansamentu ba kontijente Timor-Leste ba dahuluk tuir kompetisaun WorldSkills ASEAN ba dala 14 iha Manila-Filipina iha salau La Sama iha Ministériu Finansas iha loron 14 Agostu 2025.
“Iha ne’ebá, ita-boot sira sei kompete ho joven talentu sira ne’ebé di’ak liu husi Sudeste Aziátiku tomak. Ida ne’e oportunidade ida atu hatudu ba mundu katak, Timor-Leste iha joven sira ne’ebé iha abilidade, talentu, no determinadu,” Vise-Primeiru-Ministru afirma.
Vise-PM mós fó hanoin katak, iha mundu ohin loron, iha abilidade mak buat ida ne'ebé iha valór liu ne'ebé ema ida bele iha.
“Ba Timor-Leste, ita-nia traballadór kualifikadu sira mak ita-nia rikusoin boot ida. Mesmo ita seidauk iha indústria boot sira, maibé ita iha buat ida ne'ebé importante liu: iha liman, iha hanoin, no ita-nia ema sira-nia kreatividade.”
Halo parte ba Organizasaun Mundiál Komérsiu (OMK /WTO) no prepara adezaun ba ASEAN signifika Timor-Leste tenke kompete iha merkadu globál no rejionál.
“Traballadór kualifikadu sira mak xave ba ita nia nasaun nia kreximentu ekonómia, dezenvolvimentu no prosperidade. La ho abilidade, ita labele la’o ba oin. Ho abilidade, ita bele harii ita nia futuru.”
Kompetisaun ida-ne'e reuni ema nain 300 partisipante hanesan kompetitor/konkorente husi nasaun ASEAN 11, inklui mos Timor-Leste, ne'ebé kompete iha área kompetensia ténika no profisionál 32, husi koziña, servisu restorante, soldadura, no área teknolojia produtiva sira seluk. Eventu ida-ne'e mak boot liu iha região nian iha área ida-ne'e, no akontese iha World Trade Center Metro Manila, fatin ne'ebé lori hamutuk péritu sira, formadór sira, joven talentu sira no reprezentante husi instituisaun balun ne'ebé liga ho formasaun no empregu.
Timor-Leste partisipa ona ba dahuluk iha Kompetisaun WorldSkills ASEAN ba dala 14, ida ne'e hanesan kompetisaun abilidade tékniku no profisionál ne’ebé importante liu iha rejiaun ASEAN. Partisipasaun iha kompetisaun ne'e organiza no koordena ho INDMO, I.P. (Institutu Nasional de Dezenvolvimentu mão-de-Obra), no reprezenta dalan estratéjiku atu promove talentu nasionál, fortifika TVET (Téknika Vokasionál no Ensino Timor-Leste) , no harmoniza ho padraun ASEAN.
Ho mensajen no suporta husi Vise-Primeiru-Ministru no Ministru Koordenadór ba Asuntu Ekonómiku (MKAE), Ministru Turizmu no Ambiente (MTA), Dato’ Seri Francisco Kalbuadi Lay no INDMO, I.P, ikus mai joven sira ne’e halo Timor-Leste nia naran morin liu husi hetan 𝐁𝐞𝐬𝐭 𝐍𝐚𝐭𝐢𝐨𝐧 𝐀𝐰𝐚𝐫𝐝𝐢𝐧𝐠 𝐨𝐟 𝐓𝐢𝐦𝐨𝐫-𝐋𝐞𝐬𝐭𝐞 iha ba kulinária iha kompetisaun WorldSkills ASEAN 2025 iha Manila, Filipna foin lalais.
