JAKARTA (TOP) – Vizita Estadu husi Prezidente Repúblika José Manuel Ramos-Horta ba Repúblika Indonézia konsege estabelese no asina nota intendimentu ha’at (4) ho Prezidente Repúblika Indonézia Joko Widodo.
Tuir konferensia konjuntu entre xefe estadu rua ne’ebé The Oe-Kusi Post (TOP) asesu liu husi kanal YouTube Sekretariadu Prezidente Indonézia katak, governu rua asina MoU rua, dahuluk mak kona-ba kooperasaun bilateral entre nasaun rua iha área agrikultura. Akordu bilateral ne’e asina husi Ministru Agrikultura Indonézia Syahrul Yasin Limpo no Ministru Agrikultura no Peska Timor-Leste Pedro dos Reis. Asina nota intendimentu daruak nian kona-ba movimentu transfronteirika iha base Coach (bus) komersial husi Ministru Transportasaun Indonézia Budi Karya Sumadi no Ministru Transporte no Komunikasaun Timor-Leste José Agustinho da Silva.
Iha biban ne’e mós asina tan MoU adisional rua, Ajênsia Nasionál Normalizasaun Indonézia ho institutu Timor-Leste ba padronizasaun kualidade, avaliasaun konformidade no metrolojia.
Ministru Komersiu Indonézia Zulkifli Hasan asina mós akordu ida ho Ministru Turizmu Komersiu no Industria iha kooperasaun teknika ba negósiu.
Hafoin asina nota intendimentu hirak ne’e, xefe estadu rua halo kedas konferensia imprensa konjuntu.
Prezidente Repúblika Indonézia Joko Widodo hateten, vizita Xefe Estadu Timor-Leste ba dala uluk ba Repúblika Indonézia nu’udar honra boot ida ba nia.
“Ita diskuti ona serbisu kooperasaun bilateral oioin ho transparansia no amigavel, no komitmentu haforsa kooperasaun ekonomia sai nu’udar foku ba diskusaun. Dahuluk, ita konkorda atu kontinua aumenta komersiu entre nasaun rua ne’ebé durante ne’e la’o positivu, no ha’u fiar komersiu entre nasaun rua bele kontinua aumenta liutan,” hateten Prezidente Jokowi liu husi konferensia imprensa iha Palásiu Prezidensial Bogor, Tersa 19 Jullu 2022.
Daruak, nasaun rua mós konkorda hodi konsolida konetividade tantu iha rai-maran no tasi.
“Ba rota rai-maran, ha’u espera bele lansa ona bus rota Dili-Kupang bele halo ona, no ba konetividade tasi nian, ha’u konsidera importante tebes atu loke rota ró Kupang-Dili-Darwin,” esplika Prezidente Jokowi.
Datoluk, TL ho RI mós konkorda atu haforsa liutan dezenvolvimentu iha área fronteira.
“Ha’u espera dezenvolvimentu PLBN (Pos Lintas Batas Negara) ka Posto transfronteirika (Cross-Border Post) iha Napan NTT bele finaliza iha tinan ida ne’e. Ha’u mós endorsa atu Joint Border Committee bele halo fali. Dahat, ha’u hato’o ha’u nia komitment ba empreza estatal Indonézia nian atu partisipa iha dezenvolvimentu Timor-Leste inklui iha área infraestrutura.”
“Dalima, ha’u endorsa nasaun rua bele finaliza tratadu bilateral investimentu (Bilateral Investment Treaty). Valor investimentu Indonézia iha Timor-Leste oras ne’e dadauk hamutuk millaun US$ 18 iha área bankaria, petroleum no telekomunikasaun.”
Iha fatin hanesan PR Horta hateten, nia subskreve tebes pontu sira ne’ebé mak Prezidente Jokowi hato’o iha nia diskursu eskrita ne’e refleta tebes vontade no komitmentu nasaun rua nian hodi kontinua relasaun bilateral di’ak entre nasaun rua ne’ebé dezenvolve durante tinan 20 nia laran.
“Ami sente gratidaun tebes apoiu Indonézia nian ba dezenvolvimentu Timor-Leste iha área oioin inklui iha edukasaun no dezenvolvimentu kapital umanu,” hateten PR Horta.
PR Horta mós hato’o katak, nia hakarak hare relasaun komersiu, kooperasaun ekonomiku entre nasaun rua bele aumenta liu tan.
