JAPAUN (TOP) – Komunidade internasionál kontinua rekoñese kapasidade Lider Istoriku, Kay Rala Xanana Gusmão ne’ebé susesu hodi hamorin naran Timor-Leste ba mundu liu husi sakrifisiu luta ho matenek ne’ebé Xanana hatudu durante luta tinan 24 to’o agora.
Reprezentante Kolegio Dardania (Dardania College) husi Kosovo, Arbenita Sopaj, ofisialmente entrega prêmiu ida ba Komandante em Chefe das FALINTIL, Kay Rala Xanana Gusmão iha Japaun iha loron Domingu, 21 Novembru 2021.
Reprezentante Kolegio (Dardania College) Arbenita Sopaj, hato’o agradese ba Xanana no konsidera apresiasaun ne’e hanesan sinál agradesimentu ba esforsu Xanana nian hodi fó kontribuisaun fahe esperensia ba Kosovo kona-ba dame no rekonsilasaun (peace & reconciliation) iha Timor-Leste ne’ebé hato’o husi diskursu via mundu virtuál iha loron 24 Juñu 2021.
“Apresiasaun award ne’e hosi Dardania College, Kosovo Tanba ninia (Xanana) kontribuisaun ba Peace no Reconciliation iha Timor Leste hosi fahe esperiensia ne’e ba Kosovo iha konferensia internationál ida ne’ebé hala’o iha loron 24 de Junho 2021,” katak reprezentante Dardania College, Arbenita ba Xanana.
Reprezentante Kolegio (Dardania College) Arbenita Sopaj, entrega apresiasaun ba Kay Rala Xanana Gusmão iha embaixada Timor-Leste ba Japaun. Imajen/Embaixada Japaun.
Iha oportunidade ne’e, Arbenita konvida mós eis Prezidente Repúblika Xanana atu vizita ba Kosovo hodi fahe esperensia kona-ba luta Timor-Leste no prosesu rekonsiliasaun ba sosiedade no estudante universidade sira.
Iha fatin hanesan, Xanana hato’o agradese ba Dardania College ne’ebé entrega prêmiu ne'e.
Xanana konsidere esforsu ne’ebé nia halo hamutuk Timoroan atu lori Timor-Leste nu’udar nasaun ki’ik no kiak bele hetan rekoñesimentu hosi mundu hodi halo parte iha prosesu harii estadu hodi matan ba povu nia moris no hadia infraestrutura kontribui ba ekonomia ne’ebé di’ak.
Dadaun ne’e, mundu politiku rekoñese Xanana nia kapasidade, tanba susesu lori Timor ba ukun aan, kria rekonsiliasaun ho nasaun viziñu hanesan Indonézia no Austrália hodi rezolve mós disputa fronteira tasi no rai ho dalan pasifiku.
Author: The Oekusi PostWebsite:https://www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
www.OeKusiPost.com nu’udar plataforma media online iha Oe-Kusi Ambeno, Timor-Leste ne’ebé aprezenta notísia iha área oioin iha teritóriu nasionál.
Rua. Numbei, Oe-Kusi Ambeno
Mobile: +670 7723 4114
Email: info (at) OeKusiPost.com
