DILI (TOP) – Komandante em Xefe das FALINTIL, Kay Rala Xanana Gusmão ohin sai ona husi teritóriu Timor-Leste hodi ba simu Honorary Doctorate husi universidade rua (2) iha Japaun molok liuba partisipa enkontru ofisial organizasaun g7+ iha Portugal.
Tuir informasaun ne’ebé The Oe-Kusi Post (TOP) asesu, primeiru Honorary Doctorate ne’e sei simu husi univeridade ida iha Japaun iha loron 23 Novembru 2021, no ida seluk sei simu iha loron 26 Novembru 2021. Hafoin ida ne’e sei ba fó tan palestra ba estudante universitariu sira iha Universidade Waseda Japaun molok liuba Portugal.
Atividade iha Portugal ne’e ho naran Senior Official Meeting ba nasaun membru g7+ sira iha mundu, no enkontru ne’e mós sei marka prezensa husi
Prezidente organizasaun g7+ nian, ne’ebé nu’udar mós Ministru Planeamentu no Dezenvolvimentu Ekonómiku Serra Leoa nian, Francis Kai Kai.
Timor-Leste ho nasaun balun nu’udar nasaun fundador ba organizasaun g7+ iha tinan 2010, no ikus mai estabelese mós nia Kuartel Jeral iha Dili. Oras ne’e, organizasaun g7+ iha ona nasaun membru hamutuk 20 ne’ebé sirkula iha kontinente lima iha mundu.
Organizasaun intergovernamentál g7+, ne’ebé harii iha tinan 2010, husi inisiativa Timor-Leste nian. Organizasaun g7+, foufoun, nasaun hitu maka harii, no oras ne’e kompostu husi nasaun 20 husi Áfrika, Ázia-Pasífiku, Karaíbas no Médiu Oriente: Afeganistaun, Burundi, Xade, Komores, Kosta Marfín, Giné, Giné-Bisau, Haiti, Iemen, Illa Salomaun, Libéria, Papua Nova Giné, Repúblika Sentru-Afrikana, Repúblika Demokrátika Kongu, Saun Tomé no Prínsipe, Serra Leoa, Somália, Sudaun Súl, Timor-Leste no Togo. Totál populasaun husi nasaun sira ne’ebé forma organizasaun g7+ hamutuk ema millaun rihun 1,5.
Tuir planu, hafoin remata atividade organizasaun g7+ nian iha Portugal, Xanana ho nia ekipa sira sei fila mai Timor-Leste iha inisiu fulan Dezembru tinan ida ne’e.
