Tribunal Dili aplika TIR ba arguidu João Olívio Freitas

DILI (TOP) – Tribunal Distrital Dili (TDD) desidi ona Termo Identidade Rezidensia (TIR) ba Prezidente Autoridade Nasionál Komunikasaun (ANK) arguidu João Olívio Freitas iha loron Segunda 20 Novembru 2020 hodi hein prosesu investigasaun tuir mai.

Advogadu privadu Rui António Mendonça esplika, iha prosesu primeira interogatoriu ba nia kliente Prezidente Autoridade Nasionál Komunikasaun (ANK) arguidu João Olívio Freitas, Ministériu Públiku promove kedas ho krime ha’at (4) maka hanesan, krime fraude fiskal, krime burla informátika, krime brankamentu kapitais, no krime korupsaun pasiva.

Advogadu husi munisipiu Ainaro ne’e hatutan, husi sirkunstansia krime 4 ne’e Tribunal liu husi primeira interogatoriu la konsege prova indisius krime ne’ebé imputa ba arguidu.

“Tanba ne'e maka Tribunal Distrital Dili fó medida koasaun Termo Identidade Residensia ba arguidu hodi hein investigasaun tuir mai aprezenta prova testamuña ho dukumental,” esplika advogadu Rui Mendonça ba The Oe-Kusi Post iha Dili, Tersa 1 Dezembru 2020.

Advogadu Rui defende nia kliente katak, arguidu João Olívio Freitas foin maka asume kargu Prezidente ANK iha Janeiru 2018.

“Arguidu la simu dokumentu ruma relasiona ho Elite Computer. Arguidu mós seidauk implementa nia programa ruma tanba durante ne'e orsamentu laiha,” nia esplika.

Entretantu, Polisia Serbisu Investigasaun Kriminal ka’er Prezidente Konsellu Administrasaun ANK, João Olívio Freitas iha loron Kinta 26 Novembru 2020 oras tuku 11:00 dadersan, tanba deskonfia involve iha internet illegal, maibé advogadu defende katak arguidu foin maka asume kargu ne’e iha tinan 2018 no la simu dokumentu ruma relasiona ho Elite Computer.

Notisia relevante: Internet ilegal: SIK ka’er tan ona Prezidente ANK

Raimundos Oki
Author: Raimundos OkiWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Xefe Redasaun & Editor

PUBLISIDADE