DILI (TOP) – Públiku Timor-Leste inklui ulun boot sira iha nasaun ne’e sente hakfodak tebes ho informasaun ida husi nain ba Timor Plaza ne’ebé iis kotu ona iha Australia.
Tuir informasaun ne’ebé The Oe-Kusi Post (TOP) asesu husi pájina ofisial Facebook Timor Plaza at Dili Central nain ba Timor Plaza ho naran Jape Kong Su “Avó Jape” fila hikas ona ba Aman Maromak Nia kadunan Santo ho tinan 97 iha loron 26 Setembru 2022.
“Ami husi Familia Jape ho laran triste hakarak fo sai ba publiku katak Ami nia Aman “Jape Kong Su” ou ho naran estimadu “Avo Jape” fila hikas ona ba Aman Maromak nian kadunan Santo ho idade 97 anos, iha Loron, 26 de Setembru de 2022,” katak familia matebian liu husi sira nia komunikadu ba imprensa ne’ebé públika iha Timor Plaza at Dili Central.
Jape kong su sei nafatin lembra husi nia Kaben, Lai Min Ha, oan sira mak hanesan Julia, Ian, Kenny, Alan, Wendy, Tony, Connie, Danny, no Pamela no nia bei oan sira. Ne’ebé durante ne’e sira moris hamutuk iha tinan 78. Nia fila hikas ba hamutuk ho nia oan feto Vicki iha Aman Maromak nia kadunan.
Familia Jape sei la halua nia aten berani, dedikasaun, no serbisu maka’as ne’ebé nunka sente kole durante nia moris tomak.
Nia desezu ikus mak hakarak fila hikas no mai deskansa iha nia rai moris fatin ne’ebé nia hadomi tebes, Timor Leste. Mate isin sei lori fila mai Dili iha loron 6 Outubru 2022.
Jape Kong Su husik hela Timor Plaza
Durante tinan barak, Timor-Leste seidauk iha loja ida kompletu ho buat oioin mesak furak no kapas, no investor nasionál no internasional durante ne’e barak mak ladun iha interese atu halo investimentu iha Timor-Leste. Dalaruma barak mak hakarak “haknaok” de’it osan projetu sira husi governu depois lori ba investe fali iha nasaun seluk, maibé Jape Kong Su ho nia familia sira maske hetan moris di’ak ona iha Austrália nia desidi hodi tenke mai investe nia osan iha nia rai moris fatin, Timor-Leste liu husi hari tiha Timor Plaza ne’ebé eziste ona desde fulan Novembru tinan 2011.
Timor Plaza ka baibain ema bolu TP hanesan fatin famozu ida iha Timor-Leste ne’ebé ema sempre vizita lorloron, liliu ba sira ne’ebé foin tun munisipiu sira ba Dili, sira hakarak ba lalais Timor Plaza, balun tama mai dalaruma hakfodak tanba iha ambiente ne’ebé mak diferente tebes.
Timor Plaza hanesan fatin ka loja kompras ida ne’ebé harii husi husi Dili Dezenvolvimentu L.d, ne’ebé mai husi grupu Jape Empreza, especializada iha evolusaun propriedade ne'ebé boot ho kualidade aas ba arrendamentu retallu, rezidénsia no instalasaun eskritóriu iha Timor-Leste.
Historikamente, Grupu Jape harii husi Jape Kong Su iha Darwin, Territóriu Norte – ne'ebé iha tinan 1976 no pertense husi família, ne'ebé nia hun iha Timor-Leste. Ho susesu husi projetu propriedade komersiál iha sentru sidade Darwin nian, iha tinan 1980's ba Grupu Jape benefisiu di’ak no progressu ba dezenvolvimentu suku Dona Jape iha tinan 1989.
