DILI (TOP) – Durante loron hirak ne’e nia laran, sidadaun sira iha munisipiu Dili sente hakfodak no pániku tebes ho sirkulasaun informasaun falsu kona-ba kombustivel iha Dili laran laiha ona, maibé Autoridade Nasionál ba Petróleu no Mineral (ANPM) inklui Primeiru-Ministru, Taur Matan Ruak deklara ona kombustivel sei sufisiente hela.
Deklarasaun hanesan ne’e mós empreza privadu Esperansa Timor Oan (ETO) ne’ebé durante ne’e mós fornese kombustivel barak mai rai-laran husu ona ba públiku atu labele sente pániku ho informasaun falsu ne’e, tanba ETO rasik garantia katak, kombustivel ne’e sei responde konsumedor sira nia atividade lorloron to’o bainhira de’it.
ANMP ho PM Taur rezeita informasaun ne’ebé la'o iha públiku katak stock ba kuantidade kombustivel iha rai-laran daudaun ne'e menus maske stock kombustivel iha armazen Pertamina Internasional ho ETO sufisiente hodi halo atendimentu ba populasaun iha territoriu laran tomak.
"Informa ba xefe estadu kona-ba boatus ne’ebé agora la'o iha Dili laran katak mina ka kombustivel sei la iha (stock gazolina no gazoel la sufisiente), entaun ha'u dehan ba xefe estadu katak ita lalika preokupa ida ne'e, tanba primeiru ita sei konfia iha empreza sira ne’ebé halo hela sira ninia atividade, mas em kazu kona-ba nesesidade governu mós iha empreza Estatal Timor Gap bele ativa tanba ne'e sai seguransa ita nia nasaun nian," Primeiru Ministru Taur hateten ba jornalista sira iha palásiu prezidensial Dili, Kinta 28 Jullu 2022.
PM Taur dehan; "ohin Ministériu Petróleu informa ona ba ha'u, daudaun ne'e Pertamina ninia ro boot ida lori kuaze 4 miloens litru gazoel no gazolina agora iha ona tasi laran, sira dezkarega orsida lorokra'ik ka aban problema hanesan ne'e la iha ona, entaun apela ba populasaun sira labele paniku."
Nune’e mós, tuir komunikadu ba imprensa ne’ebé The Oekusi Post (TOP) asesu husi pájina ofisial Facebook ANPM haktuir katak, daudaun ne'e stock kombustivel iha armazen rua ne’ebé rai ka rezerva gazoel no gazolina ninia stock bele sustenta ba ejijensia kombustivel populasaun nian sufisiente hela.
"ANPM hakarak informa ba públiku katak fornesementu (Stock) kombustivel (Gazolina no Gazoleo) iha armazen bo’ot rua, hanesan Pertamina International Timor (PITSA) iha Praia dos Coqueiros no Esperanca Timor Oan (ETO) iha Hera sufisiente hela hodi bele atende nesesidade konsumidores iha Timor laran tomak," haktuir ANPM iha komunikadu ba imprensa.
"ANPM mós hakarak informa, oras ne’e daudaun Ró tula kombustivel atraka ona iha Ponte Kais Armazen Kompañia PITSA nian no sei halo deskaregamentu ohin loron ho kuantidade Gazolina hamutuk litru tokon 2 resin (2.494.372 litru) no Gazoleo tokon 1 resin (1.632.203 litru)."
Alende ne'e, ANPM mós sei konfirma kuantidade kombustivel iha armazen kompañia ETO nian, maske nune’e, kompania ETO fó sai ona iha sira nia pajina media sosial katak sira iha reserva kuantidade ne’ebé sufisiente.
Kompañia PITSA no ETO hanesan distributor boot rua iha Timor Leste sempre importa kombustivel tuir kalendariu importasaun, no mós depende ba nesesidade iha rai-laran. Tanba tuir ANPM to’o agora laiha interupsaun ba kalendariu importasaun kombustivel.
Ho nune’e ANPM apela ba públiku atu la presiza paniku ho rumor ka boatus kona-ba kombustivel menus iha armazen ho retallu sira.
"Ho kolaborasaun di'ak tomak hamutuk ho importadores ho postu abastesimentu kombustivel (pasokan BBM) sira hotu, ANPM sei garantia distribuisaun kombustivel iha merkadu ho efetivu no efikas."
