DILI (TOP) – Associação Comerciál Chinesa de Timor-Leste (ACCT) fó apoiu sasan nesidade báziku ba lider karismátiku, Kay Rala Xanana Gusmão atu bele fahe tutan ba vitima inundasaun sira iha rai-laran.
Apoiu ai-han hanesan, foos 20Kg hamutuk saka 125, supermie 125, minyak goreng 1,7 liter x 6 hamutuk kaixa 40 entrega direita hosi Prezidente ACCT, Kathleen Gonçalves akompañia husi membru sira ba Kay Rala Xanana Gusmão iha rezidensia Lecidere, Dili.
Kay Xanana Gusmão hato’o agradese ba apoiu hosi empreza Xineza Timor-oan no estranjeiru sira ne’ebé lolo liman hodi ajuda povu sira ne’ebé sofre indunasaun no menus ai-han.
Eis PM Xanana orgullu ho lideransa Prezidente Asosiasaun Komersiál Xineza Timor-oan iha Timor-Leste, Kathleen Fon Ha Gonçalves ne’ebé kontinua hatudu nia domin boot mobiliza komunidade Xineza iha rai-liur, no rai-laran hodi tulun Timoroan sira.
“Dala barak ona mana Kathleen Fon Ha Gonçalves nu’udar Prezidente Asosiasaun Komersiál Xineza Timor-oan no Asosiasaun Xineza Timor-oan ne’ebé hela Sydney, Austrália sira maka sempre lori apoiu mai atu fahe ba ita-nia populasaun sira ne’ebé presija iha tempu sira hanesan inundasaun foin lalais,” Xanana agradese iha nia rezidensia Lecidere, Dili, Sesta 04 Juñu 2021.
Xanana dehan, apoiu hirak ne’e sei fahe direita ba ferik katuas, no Timoroan sira ne’ebé sofre moras no difiensia matan no fiziku iha sidade Dili no munisipiu sira.
“Ita agradese tebe-tebes laran luak ba Timoroan sira, ita hatene iha Austrália mós mosu COVID-19, maibé nu’udar Timoroan sira la haluha no iha domin boot atu tulun ita nia povu ne’ebé moris iha susar,” nia hatete.
Durante ne’e Xanana Gusmão harii ekipa Sekretariadu Apoiu Solidaridade no hetan apoiu hosi emprezariu Timoroan no internasionál sira hodi hala’o misaun fó apoiu aihan, ropa no materiál kontrusaun hodi hodi kontrui uma populasaun ne’ebé mota sobu iha Dili no munisipiu balun.
Iha fatin hanesan, Prezidente Asosiasaun Komersiál Xineza Timor-oan, Kethleen Fon Ha Gonçalves dehan apoiu hirak ne’e apoiu hosi Prezidente Komunidade Xineza iha Austrália, Toni Vom no membru sira hodi ajuda Maun Boot Xanana no parte Madre Kongregasaun Canosiana Balidi no organizasaun seluk tan atu tulun povu sira ne’ebé sofre hamlaha.
Apoiu ne’e Komunidade Asosiasaun Xineza iha Austrália no Timoroan sira iha Dili oferese maka hanesan, foos, 425 saka, supermie 425, mina goren 160 kaixa no seluk tan.
“Apoiu ne’e fó atu tulun ita nia komunidade sofre inundasaun no ameasa COVID-19 iha ita nia rain, tanba ne’e Asosiasaun Xineza iha Timor-oan no iha Austrália liu hosi sira nia Prezidente Toni Vom ho membru tomak simu pedidu hodi mai entrega ona apoiu ba Maun Xanana,” dehan Kethleen.
Kethleen Gonçalves hatutan, sira nia parte sente orgullu, durante ne’e Xanana organiza empreza Timoroan sira hodi lolo liman hamutuk fó tulun ba hirak ne’ebé presiza nu’udar asaun umunitáriu ne’ebé pozitivu no importante tebes ba rai Timor-Leste.
