DILI (TOP) – Iha loron 03 Abril 2020 Primeiru-Ministru (PM), Taur Matan Ruak foti desijaun hodi ezonera kedas Vise-Ministra Saúde, Élia Antónia Amaral dos Reis, tanba mosu dezintendimentu kona-ba hato’o informasaun Covid-19 ba públiku ne’ebé la’os sai husi odamatan ida de’it, maibé populasaun barak ne’ebé simu vasina a’at entre loron 10-16 Juñu foin lalais, PM la halo ba kauza.
Primeiru-Ministru, Taur Matan Ruak ezonera Élia Amaral husi nia kargu Vise-Ministra Saúde hafoin mosu dezintendimentu kona-bá hato’o informasaun virus corona (Covid-19) ba públiku iha loron Kinta, 2 Abril 2020.
Iha loron 2 Abril 2020, públiku sente hakfodak tebes ho informasaun kona-bá COVID-19. Sentru Media ne’ebé harii ho intensaun atu halo informasaun kona-bá Covid-19 ne’e tenke sai husi odamatan ida de’it, maibé ikus mai sai husi odamatan tolu, husi Elia Amaral, Rui Maria de Araújo no Mericio Akara.
Nune’e, iha loron 3 Abril 2020 Primeiru-Ministru, Taur Matan Ruak halo ezonerasaun ba Elia Amaral bazeia ba dekretu númeru 30/2020, 3 Abril, ne'ebé hetan aseitasaun husi Prezidente Repúblika (PR), Francisco Guterres Lu Olo.
Populasaun lubuk ida iha munisipiu Dili maka governu sona tiha ona vasina a’at ba sira nia isin lolon, tanba vasina ne’e la konserva ho di’ak iha Hospital Nasionál Guido Valadares.
Tuir informasaun ne’ebé The Oe-Kusi Post (TOP) asesu, kazu vasina a’at ne’e akontese bainhira eletrisidade iha farmasia HNGV mate, nune’e vasina sira ne’ebe tau iha jeleira laran a’at hotu kedas, maibé Ministra Saúde, Odete Maria Freitas Belo nu’udar ulun boot iha área saúde ne’e autoriza nafatin pessoal saúde sira hodi kontinua sona vasina a’at sira ne’e ba populasaun lubun ida nia isin-lolon husi loron 10 to’o 14 Juñu tinan ida ne’e. Iha ona 15 Juñu 2021 maka foin deskobre katak, vasina sira ne’e a’at tiha ona.
Nune’e, iha loron 6 Agostu 2021, Ministériu Saúde foin aviza fali ba médiku balun ne’ebé simu vasina iha loron 10 to’o 14 Juñu 2021 atu simu fali vasina foun (sona ba dala tolu). Avizu ida ne’e ba de’it pesoal saúde sira, inklui médiku balun ne’ebé serbisu iha Sentru Integradu ba Jestaun Krize (SIJK) atu vasina fila-fali.
Kazu populasaun barak simu vasina a’at ne’e grave tebes, maibé ikus mai Primeiru-Ministru, Taur Matan Ruak la’os ezonera Ministra Saúde, Odete Maria Freitas Belo, maibé rezolve liu husi husu deskulpa de’it ba populasaun sira ne’ebé sona tiha ona vasina a’at iha sira nia isin lolon.
Iha loron 11 fulan Agostu 2021, Primeiru-Ministru Taur Matan Ruak hafoin hetan informasaun kona-ba vasina ne’ebé hetan estragus iha HNGV iha loron 5 fulan agostu ne’e, orienta kedas ba Inspetór Jeral Estadu atu inísia prosesu auditoria ba asuntu ne’e, atu buka hatene kona-ba kauza husi problema ne’e.
Tuir informasaun preliminaria ne’ebé iha katak, iha loron 10 to’o 15 fulan juñu liubá, akontese instabilidade enerjia elétrika iha ONGV hodi prejudika ba sistema refrijerasaun armazenamentu vasina AstraZeneca nian nune'e provoka irregularidades iha temperatura refrijeradór hodi hetan prejuízu sira ne'e.
Tanba ne’e tuir konkluzaun no rekomendasaun hosi Konsellu Tékniku Nasionál Imunizasaun Timor-Leste (NITAG-TL) hamutuk ho Organizasaun Mundial ba Saúde (OMS), konklui katak ema sira ne’ebé simu vasina hosi loron 10 to’o 15 fulan juñu espesífiku iha HNGV konsideradu nulo/inválidu, nune’e rekomenda tebes atu simu fila-fali vasinasaun foun.
“Lamenta tebes ho insidente ne’e, no husu deskulpa ba profisionais saúde no utente sira ne’ebé simu ona vasina iha loron 10 to’o 15 fulan juñu iha HNGV, no orienta ona ba Ministériu Saúde atu kuidadu liután iha jestaun, nune’e iha tempu sira oin mai akontesimentu sira hanesan ne’e labele akontese fila-fali,” hateten Primeiru Ministru, Taur Matan Ruak liu husi nia komunikadu ba imprensa iha loron 11 Agustu 2021.
