DILI (TOP) – Rezultadu serbisu husi ajência Estados Unidos ba Desenvolvimento Internasional (USAID) ba nia projetu Avansa Agrikulta ne’ebé implementa iha Timor-Leste kuaje tinan 6 ona konsege kapasita ona prátika agrikultura moderna ba ema nain 12,800 resin inklui ema nain aumenta sira nia rendimentu husi $235 ba $2,661 kada fulan.
Tuir Komunikadu ba Imprensa ne’ebé The Oe-Kusi Post asesu husi parte media Embaixada Estadus Unidus Amérika (EUA) iha Timor-Leste katak, Enkaregadu Negósiu Embaixada EUA iha Timor-Leste, Elias Parra lidera ona eventu enseramentu hodi selebra susesu barak husi USAID nia Projetu Avansa Agrikultura, hafoin serbisu besik tinan ne’en (6) nia laran no projetu ne’e programadu atu termina iha fulan Janeiru, 2021.
Atu fó ênfaze ba susesu projetu ne’e nian ba ofisiál senior governu Timor-Leste sira, partisipante sira iha eventu ne’e, sei hatene liu tan oinsa agrikultor liu 33,000, kooperativa, no negósiu sira haluan sira nia negósiu ba merkadu no fornesedor sira. Iha área ne’ebé Avansa servisu ba:
- Ema liu 12,800 mak hetan formasaun konaba prátika agríkula moderna
- Rendimentu agrikultor no koletor produto sira aumenta liu pursentu 1,100, husi $235 ba $2,661 fulan ida husi 2015 to’o 2020
- Poupansa grupu agrikultor aumenta kuaze pursentu 300
- Númeru hamlaha diminui husi pursentu 15 ba 0.9 iha fatin sira projetu ne’e implementa ba
Avansa ajuda ona hadiak prátika agrikula liu husi apoiu ba setor privadu hodi hetan ferramentu agríkula moderna no finansiamentu ba agrikultor sira, koletor produtu no negósiu ki’ik sira. Modelu ida ne’ebé susesu tebes mak, Avansa harii relasaun ho fornesedor sira no banku sira atu hasae uzu teknolojia no finansiamentu moderna ho agrikultor sira iha projetu ne’e.
Agrikultor sira hetan edukasaun finanseira atu hetan impréstimu hodi sosa ekipamentu moderna agríkula nian ne’ebé drastikamente hadiak produtividade agríkula. Agora, kompañia fornesedor agríkula Timor oan nian oferese formasaun konaba ekipamentu sira ne’ebé sira fa’an no independentemente apoiu agrikultor sira liu husi mekanizmu hanesan ne’ebé USAID implementa liu husi AVANSA.
“Governu Estadus Unidus orgullu apoia Timor-Leste nia jornada ba auto-sufisiénsia no projetu ida ne’e, ezemplu exelente ida. Ami espera atu involve nafatin ho parseiru tuan no foun sira atu harii agronegósiu ida ne’ebé bele hatan demanda ba produtu ho valor a’as. Agrikultor mak investor xave iha sira nia tranzisaun susesu husi agrikultura subsisténsia ba agrikultura komersial no projetu Avansa ajuda ona sira no Timor-Leste nia jurnada ba auto-sufisiénsia,” hateten Enkaregadu Negósiu Elias Parra.
