Oekusipost.com Dili – Ministériu Saúde fó sai ona informasaun ofisial katak ema nain 5 ne’ebé antes ne’e tama karantina livre total ona husi virus corona, tanba rezultadu teste iha Austrália hatudu negativu, la’ós positivu. Maibé, informasaun ofisial ne’e seidauk konsege hamate no hamihis preokupasaun públiku kona-bá kestaun ne’e rasik.
Ministra Saúde Interina no Prezidente Komisaun Interministerial ba Koordenasaun medidas prevensaun no kontrolu surtu coronavirus, Élia A. A dos Reis Amaral liuhusi konferénsia Imprensa,iha Palásiu das Sinzas, Kaikoli deklara ba públiku katak, simu ona rezultadu kazu ema suspeitu ba infesaun Coronavirus na'in 5 ne’ebé haruka amostra ba Austrália hodi halo konfirmasaun ba teste ne’ebé antes ne'e halo iha Laboratóriu Nasionál Timor Leste.
"Grasas ba Na'i Maromak, rezultadu sai negativu. Rezultadu ida ne’e signifika, Pasiente ema na'in 5 ne’ebé sente sintomas infesaun la iha Coronavirus. Sira hotu livre husi moras ida ne’e!," hatete Ministra Interina Elia liu husi konferensia ba imprensa iha nia serbisu fatin, Tersa 24 Marsu 2020.
Nia hatutan, ekipa médika ne’ebé akompañia no monitoriza pasiente na'in 5 desidi ona atu fó alta ka liberta sira husi kuarentena tanba sira nia kondisaun di'ak no rekopera ona husi síntomas Klíniku.
"Ha'u hakarak informa mós ba populasaun Timor tomak katak, Timor-Leste ne’ebé iha ona kazu ida ne’ebé konfirmadu sábadu semana kotuk, pasiente ne’e kontinua halo tratamentu médiku no nia kondisaun to’o agora kontinua estável," nia esplika.
Parte Ministériu kontinua apela ba populasaun tomak atu, mantein kalma la bele pániku; pratika ijiene pesoal no fase liman ho sabaun bebeik; Labele kaer liman no maintéin distánsia Ema ida dook metru ida; Tein hahan (na’an) no halo tasak didiak; Karik iha ema ruma mak hetan sintomas isin manas, mear no susar dada iis, favor ida kontaka linha aberta CorVid-19 númeru 119. Hatete lalais kedas autoridade saúde iha aeroporto, portu no fronteira, nomós iha Sentru Saúde ka Klínika husi área geográfika; Ba fatin públiku ka privadu hotu hotu – inklui instituisaun Estadu, Eskola no Universidade, Fasilidade Saúde no Klínika, otéis no Restaurante, Merkadu, Loja no kios, terminal kareta ka mikrolet – tau atensaun ba distansia sosial, ijiene no limpeza, prepara fatin ida ho bee mós no sabaun atu kliente ka funsionáriu sira bele uza; karik iha informasaun ruma kona-ba Ema ne’ebé tama ilegal no la halo kuarentena obrigatoriu favór kontaktu númeru telefone 119.
Nia dehan, komisaun Interministerial ba Coronavirus halo esforsu makas hodi protje populasaun husi moras ida ne’e, maibé preokupasaun públiku nian ne’e hatudu iha plataforma media sosial, liliu utilizador Facebook barak mak seidauk iha klareza no satisfeitu ho esforsu governu nian hodi hato’o informasaun ho loloos no kompletu kona-bá ema sira ne’ebé deskonfia iha sintomas ba virus corona ne’e rasik.
Iha loron Sábadu, 21 Marsu liuba, Ministra Saúde Interina, Elia Amaral anunsia ba públiku katak rejista ona ema ida positivu infetadu Coronavirus Disease 2019 (CorVid-19), maibé la esplika kona-bá ema ne’e nia orijin, no durante ne’e hela iha ne’ebé, hasoru malu ho ema se de’it no seluk tan. Ida ne’e Ministra Interina la fó espasu ba pergunta.
Situasaun ne’e mós halo nafatin iha loron Tersa, 24 Marsu 2020 bainhira anunsia kona-bá ema nain 5 ne’ebé katak livre total husi CorVid-19 ne’e, maibé nafatin la fó espasu ba pergunta. Lala’ok governu nian hato’o informasaun hanesan ne’e la’ós de’it atu hamihis no hamenus informasaun falsu sira iha rai-laran, maibé haburas liutan de’it.
