Oekusipost.com – Negosiante Xineza sira iha hahu taka ona sira nia loja sira iha kapital Dili hafoin governu liu husi Ministériu Saúde (MS) anunsia estranjeiru ida positivu infetadu moras Coronavirus Disease 2019 (CorVid-19) iha loron Sábadu, 21 Marsu liuba.
Tuir observasaun Oe-Kusi Post, maioria negosiante sira ne’ebé hala’o sira nia atividade negósiu iha área Audian, Dili kuaje maioria taka, ho rajaun sira mós sente pániku ho informasaun ofisial ne’ebé anunsia husi governu kona-bá CorVid-2019, no mós tanba hetan pedidu husi sira nia embaixada iha Timor ne’ebé husu ba sira atu taka provizoriu sira nia atividade negósiu hodi prevene CorVid-19.
Tuir Xefe Asosiasaun Emprezariu Xina iha Timor-Leste katak, agora sira taka hela sira nia atividade negósiu, tanba sira mós pániku no konfuzaun ho anunsiu governu nian.
“Ami seidauk hatene, ami sei taka parese loron 10 hanesan ne’e,” hatete Xefe Asosiasaun Emprezariu Xina via kontaktu telemové ba Oe-Kusi Post, Kuarta 25 Marsu 2020.
Nia hatutan, nia maluk Xineza sira tauk hotu hafoin MS anunsia moras CorVid-19 ne’e tama ona iha Timor-Leste.
“Kolega Xina sira tauk hotu. Moras ne’e iha Wuhan ne’e halo ema tauk hotu. Agora ami hare loja balun sei kontinua loke hela, maibé sira ne’e seidauk hatene klaru kona-bá moras ne’e,” nia esplika.
“Ami nia embaixada mós fó hatene ona mai ami, tanba ne’e mak ami taka,” nia esplika.
Entretantu, reuniaun Konsellu Ministru ne’ebé hala’o iha Sentru Konvensaun Dili iha loron 23 Marsu 2020, hato’o ona pedidu ba Prezidente Repúblika (PR) hodi anunsia Estadu emerjénsia, maibé molok PR anunsia Estadu emerjénsia tenke hetan uluk autorizasaun husi Parlamentu Nasionál, no PR mós haruka ona pedidu ne’e ba PN iha loron Tersa, 24 Marsu 2020, maibé to’o oras ne’e PN seidauk foti desijaun.
