Oekusipost.com Dili – Arsebispu metropolitana Dili, Dom Virgílio do Carmo da Silva, SDB suspende ona misa iha vigararia Dili no Parókia Dare.
Suspensaun ne'e, Dom Virgílio ofisialmente fó sai liu husi komunikadu Pastorál iha Sekretariadu Kámara Ekleziastika Lesidere Dili.
Dom Virgílio hatete, haree ba situasaun atuál iha Timor-Leste katak, 'Corona Virus' (COVID-19) realidade ida ona, iha Timor laran no tuir informasaun ofisiál husi Ministériu Saúde iha palásiu das Sinzas iha loron 21 fulan Marsu 2020 katak, COVID -19 deteta ona iha Timor-Leste.
"Nu'udár ita hotu hatene , virus Corona fásil tebes atu da’et husi ema ba ema. Tanba ne'e, ha'u ata hola medida atu evita virus ne'e habelar iha komunidade Timor Oan sira le’et, hodi hein desizaun ikus husi Conferência Episcopál Timorense (CET)," hatete Arsebispu ne'e.
"Hahú Domingu 22 Marsu to'o Sábadu 28 Marsu 2020 sei vigora desizaun hirak tuir mai iha vigararia Dili ho parokia Dare. Desizaun sira mak hanesan, sei suspende misa sira hotu dominikál, diária, exequial, iha Igreja ho nia Kapela sira hotu, suspende mós retiru no enkontru sira", nia hatutan.
Arsebispu husu ba sarani sira atu reza de'it iha uma no halo kumuñaun espirituál. Husu ba Amu lulik sira atu selebra nafatin misa privada sem asisténsia povu hodi reza ba sarani sira nia di'ak.
Alende ne'e, via sakra iha loron Sesta 27 Marsu 2020 husu sarani sira halo vía sakra iha uma de'it. Misa diária iha Kapela sira, semináriu sira, uma relizioja sira, relijiozu sira, ba de'it rezidente sira.
Husu ba Amu lulik sira hotu ne'ebé hela iha vigararia Dili no Parókia Dare atu ezekuta desizaun hirak ne'e, sem rezerva hodi proteje Povu husi Corona Virus", nia husu.
Bibi atan ne'e mós apela ba sarani sira hotu Arkedioseze Dili nian, atu Badinas nafatin halo peniténsia, orasaun no karidade. Labele tama iha pániku maibé, hein nafatin ho laran metin Maromak nia laran luak no nia domin rohan laek ne'ebé ema hotu koko to'o biban ida ne'e. (*)
