Oekusipost.com – Eis administradór Dioseze Dili, Bispu Dom Carlos Filipe Ximenes Belo, husu ba Timoroan hotu atu labele Pániku ho Corona Virus, maibé tenke Reza.
"Favór ida husu ba maluk sira lalika pániku, ida di'ak hela iha uma, labele kontaktu ho ema infetadu sira, fase liman beibeik, kuandu me'ar taka ibun ka inus ho lensu. Tuur no hamriik dodook-malu", Dom Carlos fó sai apelu ne'e liuhusi ninia pájina ofisiál Facebook.
Dom Carlos husu Timoroan hotu atu Reza, no labele lakon esperansa, liu-liu reza tersu loro-loron.
"Tenki reza, ami iha ne'e, loro-loron halo adorasaun Santíssimu no reza tersu", Bibi atan nee husu.
Dom Carlos mós fó hanoin ba TimorOan hotu katak, bainhira iha síntomas Corona Virus tenke ho voluntariamente ba halo teste hodi hatene ddi’ak.
"Sintomas hosi Coronavirus (Covid-19): isin-manas, me'ar forte no dada iis la di'ak. Se iha sintoma ne'e tenki ba konsulta", Dom. Carlos husu.
Entretantu, hafoin Minista Saúde Interina, Elia Amaral anunsia estranjeiru ida positivu infetadu ona virus corona, Arsebispu metropolitana Dili, Dom Virgílio do Carmo da Silva, SDB hahú suspende misa iha vigararia Dili no Parókia Dare. Suspensaun ne’e hahu husi Domingu 22 Marsu to'o Sábadu 28 Marsu 2020.
Dotora Virna Martins Sam mós hahu fahe maneira balun kona-bá oinsa prevene aan husi virus ne’e liu husi hamoos areador uma nian, liu-liu hamoos uma laran.
Uza "desinfektan" hanesan Alcol, Lysol ka Dettol hodi hamoos meja leten, sofa ka kadeira no fatin ne’ebé labarik sira sempre kaer. Fase liman bebeik ho sabaun bainhira kaer buat foer ruma. Keta husik labarik sira ba halimar iha liur ka ba halimar iha vizinho nia uma. Keta lori labarik sira ba vizita familia ka kolegas sira nia uma. Ida-idak iha nia uma de’it. Labele simu bainaka maske familia rasik.
Dotora ne’e hatutan, bainhira inan-aman ka ema boot sira iha uma sai ba serbisu ka ba fatin ruma, halo favor uza masker, fila mai uma tenki hasai masker tau kedas iha lixo fatin, hasai roupa hotu hoban kedas ba bee, haris ho fase fuk hafoin bele hakbesik ba labarik sira.
Se iha uma laran, balun mear ka inus ben ka isin manas tenki uza masker, no hadook aan husi membrus familia sira seluk. durante semana 2 nia laran too hetan fali isin di’ak. Tenki taka ibun bainhira mear ka fani. Labele aseita ema ka familia ruma mai husi rai liur atu ba hela ho imi, di’ak liu haruka ba hela iha Hotel!
Sosa no rai hahan ne’ebé imi nia oan sira gosta "favorite foods", no hahan ne’ebé saudavel hanesan: susu ben, Naan, ikan, manu-tolun, modo, ai-fuan, atu nune’e, sira bele han di’ak no bele hasa’e sira nia imunidade. Prepara aimoruk simples hanesan Paracetamol, Coldrexin, OBH. Se presiza lori labarik ba konsulta karik lori loos de’it labarik ne’ebé moras.
Maun-alin sira seluk labele ba, tanba bele hetan moras bainhira tama iha Ospital ka konsultorio ruma. Práktika Higiene bebeik no lorloron. Sasan hotu iha ita nia isin lolon, iha uma laran, uma liur tenki moos. Familia ne’ebé mak iha oan klosan bandu sira labele ba ransu ho kolega sira, tanba grupu idade ida ne’e mak baibain bolu dehan "ASYMPTOMATIC " ka sira lori moras, maibé laiha sintomas, no sira mak sei hadaet moras ne’e ba ema seluk fasil liu. Para ba halo festa no halo reuniaun.
