Covid-19: suspeitu kazu Kovalima negativu

DILI (TOP) – Rezultadu teste hatudu hatudu sidadaun ida ne’ebé deskonfia nu’udar suspeitu ba kazu moras virus corona (Covid-19) iha munisipiu Kovalima hatudu negativu.

Dotora Odete da Silva Viegas husi Sentru Integradu ba Jestaun Krize esplika ospitál Referál Suai rejista duni, iha domingu lorokraik, pasiente ida ho sintoma ba Covid-19 hanesan, isin manas ho temperatura 39, mear no kakorok moras ne'ebé mai konsulta iha Ospitál ne'e. Hare ba kondisaun ida ne'e, pesoál saúde sira iha Ospitál Referál Suai desidi koloka kedas pasiente iha sala izolamentu no ekipa laboratóriu foti kedas nia amostra hodi haruka mai iha Ospitál Nasionál Guido Valadares hodi halo análize laboratóriu.

Tuir Odete, rezultadu teste husi suspeitu fó sai iha Segunda 08 Juñu 2020 katak negativu.

“Atu evita propagasaun vírus ne'e iha komunidade nia leet, ekipa vijilánsia sentinela iha munisípiu Covalima mós buka tuir kedas família inklui ema sira ne'ebé iha kontaktu besik ho suspeitu hodi foti sira nia amostra ba halo ezame laboratóriu no rezultadu seidauk fó sai,” Odete esplika.

Odete hatutan, sidadaun ne'e, durante ne'e hala'o knaar hanesan negosiante ida iha fronteira ho Indonézia, tanba ne'e konsidera nia hanesan suspeitu tanba iha kontaktu ho ema sira ne'ebé mai husi nasaun afetadu.

Timor-Leste manteinn kazu konfirmadu 24 no provável 4 ho kazu foun ikus rejista iha loron 24 fulan-abril.

Oras ne'e dadaun, ema iha kuarentena obrigatóriu hamutuk 58 no auto-kuarentena hamutuk 56. Ema ne'ebé kompleta ona loron 14 iha kuarentena kumulativamente hamutuk 2397.

Marcelino Bata
Author: Marcelino BataEmail: Este endereço de email está sendo protegido de spambots. Você precisa do JavaScript ativado para vê-lo.

PUBLISIDADE