Oekusipost Dili – Koaligasaun minoria entre partidu FRETILIN ho Partidu Libertasaun Popular (PLP) foti ona “reasaun” hasoru koaligasaun Aliansa Maioria Parlamentar (AMP) foun hodi sarani sira tenta atu hamonu governu atual.
Bankada FRETILIN ho bankada PLP denunsia tentativa atake ba poder ne’ebé hala’o hela husi aliansa foun, Aliansa Maioria Parlamentar.
Vise-Xefe Bankada PLP, Francisco de Vasconcelos hatete, tuir loloos sira nia deputadu sira mai iha parlamentu nasional hodi hola parte iha sesaun plenaria atu vota ba proposta lei ida ne’ebé governu hatama mai Parlamentu Nasionál atu halo alterasaun da tolu ba Lei No. 13/2009, de 21 Outubro, kona-bá Orsamentu no Jestaun Finanseira.
“En vez de mai iha parlamentu atu vota, sira ba halo fali halo konferensia imprensa ne’ebé ho intensaun atu hamonu governu,” hatete Vise-Xefe Bankada PLP, Francisco de Vasconcelos liu husi konferensia konjuntu entre FRETILIN no PLP ba imprensa iha Parlamentu Nasionál, Dili, Kuarta 25 Marsu 2020.
“Ida ne’e hatudu momoos katak CNRT ninia hakarak mak atu hadau de’it poder husi Governu ida ne’ebé sei halo hela esforsu no presiza apoiu tomak husi Parlamentu Nasional atu bele kombate hasoru virus Corona ne’ebé oras ne’e kria pandemia mundial, no ameasa hela povu Timor-Leste no Timor oan rihun ba rihun ne’ebé sofre konsekuensia husi inundasaun semana balu liu ba iha Dili”.
“Ami mos lamenta tamba koligasaun foun ida ne’ebé CNRT obriga-an atu hari, ne’ebé seidauk hatudu prova iha Parlamentu Nasional katak sira iha duni maioria no seidauk mós prienxe rekejitu sira ne’ebé Prezidente da Repúblika husu ba sira atu prienxe, mai obriga orgaun soberanu sira atu hakruk ba sira nia tentativa atu hadau poder husi Governu Konstitusional ida”.
Entretantu, antes ne’e portavoz AMP, António da Conceição (Kalohan) liu husi konferensia ba imprensa iha sede partidu CNRT iha loron Sábadu, Tersa 24 Marsu 2020, ezije ba Prezidente Repúblika (PR) hodi demite ona Primeiru-Ministru (PM), Taur Matan Ruak, tanba laiha ona kompetensia hodi kontinua governa governu atual.
Prezidente AMP, Kay Rala Xanana mós hato’o ezijensia ba PR atu demite ona PM, Taur, tanba tuir konstituisaun katak kuandu orsamentu laliu no liu tiha loron 60, PR tenke foti ona desijaun hodi demite PM.
“Prezidente tenke demite ona Primeiru-Ministru, tanba kuandu orsamentu la liu iha Parlamentu Nasionál, liu loron 60 nia tenke foti desijaun ruma,” hatete Xanana liu husi konferensia ba imprensa iha sede partidu CNRT iha Bairu Grilos-Dili, Tersa 24 Marsu 2020.
Entretantu, PM, Taur Matan Ruak submete ona nia pedidu demisaun ba PR, Francisco Guterres Lu Olo iha loron 25 Fevereiru 2020 hafoin partidu governu blokeia nia Orsamentu Jeral Estadu (OJE) 2020 iha loron 17 Janeiru 2020, maibé to’o oras ne’e seidauk iha desijaun final husi PR rasik.
