DILI (TOP) – Tribunal Rekursu (TR) foti ona desijaun hodi rejeita rekerimentu husi Prezidente Parlamentu Nasionál (PPN), Arão Noe de Jesus da Costa Amaral, tanba prosesu destituisaun ba nia kargu ne’e nu’udar aktu politika.
Deputadu sira hamutuk 40 ne’ebé mai husi bankada PLP, Khunto, FRETILIN inklui deputadu nain 4 husi Partidu Demokrátiku (PD) halo “asaltu poder” hodi “hadau” tiha meja Parlamentu Nasionál, no halo destituisaun ba kargu Arão Noe nian nu’udar PPN iha loron 19 Maiu liuba. No hili fali deputadu Aniceto Guterres hodi asume hikas kargu PPN. 
Ho aktu ne’e, Arão Noe hato’o rekerimentu ida ba TR hodi husu fiskalizasaun konstitusionalidade, no ikus mai TR desidi rejeita tiha, tanba konsidera aktu hirak ne’e nu’udar aktu politika. Nune’e, Arão Noe de Jesus da Costa Amaral oras ne’e nu’udar deputadu baibain ona, la’ós ona nu’udar PPN.
Tuir surat desijaun TR nian ne’ebé The Oe-Kusi Post asesu, “to’o iha ne’e, ho konsiderasaun ba dispostu iha parte ikus liu paragrau c) número 1, husi artigu 355 Kodigu Prosesu Sivil, petisaun nee tenke rejeita ka indeferida”.
Surat desijaun TR ne’ebé fó sai iha loron Kinta, 28 Maiu 2020, asina husi juiz Deolindo dos Santos, Duarte Tilman Soares no António José Fonseca de Jesus.
Entretantu, antes ne’e Prezidente Partidu CNRT, Kay Rala Xanana Gusmão katak, nia respeita tebes juiz sira iha Tribunal Rekursu, tanba mesak matenek de’it, maibé nia la fiar ona lei sira. Nune’e, Xanana dehan nia sei konsidera Arão Noe nu’udar PPN.
“Ne’e halo ita hanoin fali katak ita mak hakarak … ha’u atu buka tok lei ne’e nia folin to’o iha ne’ebé, ha’u ba asaltu uma ida. Ba tiha asaltu uma ida, hadau tiha uma, ha’u duni tiha uma nain, nia sai. Ha’u hela iha uma ne’eba. Agora uma nain iha ona liur, nia ba keixa iha Tribunal. Tribunal dehan o nia keixa ne’e o sei uma nain ka la’e. La’e sira duni tiha ona ha’u iha liur, entaun la vale, tanba agora ne’e sira mak hela iha uma ona, sira mak nain ba uma ona, hanesan loloos kedas,” lamenta Xanana liu husi konferénsia ba imprensa iha sede partidu CNRT iha bairo Grillos, Dili Sábadu 23 Maiu 2020.
Notisia relevante: Xanana Nafatin Konsidera Arão Noe Nu’udar PPN
