DILI (TOP) – Prezidente Partidu CNRT, Kay Rala Xanana Gusmão hateten, estrutura tomak CNRT nian to’o oras ne’e kontinua konsidera Arão Noe de Jesus da Costa Amaral nu’udar Prezidente Parlamentu Nasionál (PPN), tanba saida mak akontese iha loron 19 Maiu liuba iha Parlamentu Nasionál (PN) ne’e nu’udar hadau poder.
Iha loron 19 Maiu 2020 oras meudia, deputadu sira husi bankada Partidu Libertasaun Popular (PLP), Khunto, FRETILIN no aumenta tan deputadu nain 4 husi Partidu Demokrátiku “ilegalmente” halo destituisaun ba meja PN ho votus 36, no halo destituisaun ba PPN ho votu afavór 40, nain ha’at husi PD hodi hili hikas deputadu Aniceto Guterres asume hikas kargu PPN, maske votasaun ne’e la tuir ona rejimentu katak tenke votu sekretu, maibé votasaun ne’e hatudu malorek de’it.
Hafoin ida ne’e, Prezidente Parlamentu Nasionál, Arão Noe de Jesus da Costa Amaral hato’o kedas rekerimentu ida ba Tribunal Rekursu (TR) hodi husi fiskalizasaun abstratu iha oras tuku 4 liu minutu 30 resin, maibé TR hato’o fali despaisu ida hodi husu lejitimidade rekerente ne’e nu’udar PPN ka la’e, se la’os nu’udar PPN, entaun rekerimentu ne’e la vale ona, tanba konstituisaun RDTL artigu 150 la fó dalan ba deputadu ida ka sidadaun ida atu husu TR hodi halo fiskalizasaun abstratu.
Notisia relevante: Arão Noe hato’o rekerimentu nu’udar prezidente parlamentu nasionál
Kona-ba kestaun ne’e, Xanana Gusmão konsidera juiz sira matenek hotu, maibé nia mak la fiar tiha ona lei.
Maske TR rasik to’o oras ne’e seidauk hakotu lia ruma kona-ba kazu ne’e, maibé Xanana konsidera kazu hadau meja iha PN ne’e hanesan loos ema ida ba asaltu ema seluk nia uma. To’o ne’eba, duni sai tiha uma nain, no uma nain sai tiha ba liur hodi ba hato’o keixa ba iha Tribunal, maibé Tribunal dehan ne’e loos ona, ida asaltu ne’e mak sai fali uma nain.
“Ne’e halo ita hanoin fali katak ita mak hakarak … ha’u atu buka tok lei ne’e nia folin to’o iha ne’ebé, ha’u ba asaltu uma ida. Ba tiha asaltu uma ida, hadau tiha uma, ha’u duni tiha uma nain, nia sai. Ha’u hela iha uma ne’eba. Agora uma nain iha ona liur, nia ba keixa iha Tribunal. Tribunal dehan o nia keixa ne’e o sei uma nain ka la’e. La’e sira duni tiha ona ha’u iha liur, entaun la vale, tanba agora ne’e sira mak hela iha uma ona, sira mak nain ba uma ona, hanesan loloos kedas,” lamenta Xanana liu husi konferénsia ba imprensa iha sede partidu CNRT iha bairo Grillos, Dili Sábadu 23 Maiu 2020.
Xanana hare situasaun ne’e katak, Estadu direitu demokrátiku ne’e la’os sala dalan ona, tanba naran mak Estadu direitu demokrátiku, maibé “bele bele viola konstituisaun, bele viola lei sira, bele viola rejimentu sira, no Tribunal dehan loos hotu”. Ne’e funsiona iha regra jeral sa. Lei sira ne’ebé hakerek ne’e la importa ida.
“Maibé, partidu CNRT sei defende Estadu direitu demokrátiku hodi husu ba militante partidu CNRT nian atu tuur hakmatek. Ita laiha dalan seluk, maibé kontinua nafatin hatudu ba mundu mós katak ita defende Estadu direitu demokrátiku,” apela Xanana.
Nia esplika, kuandu dehan Estadu direitu ne’e katak Estadu ida ne’ebé lei mak impoin. Lei iha ema hotu nia leten.
“Ha’u mak baruk ten, la’e aban ha’u hadau ona ema balun nia uma. Ha’u tama, ha’u ba fali juiz ida nia uma tok. Nia sai tiha, nia ba keixa, dehan la’e o iha ona liur, o la’os uma nain ba uma ne’e. Ne’ebé despaixu ida kona-bá Prezidente Parlamentu, ami sei konsidera hanesan Prezidente Parlamentu, tanba iha ne’eba ne’e asaltu poder,” afirma Xanana.
