DILI (TOP) – Premiadu Nobel da Paz, José Ramos Horta deklara nia parte halo ona kontaktu di’ak ho governu Japaun no Alemaña atu simu tan joven Timoroan sira ba servisu iha rai rua ne’e hodi hadia sira nia moris familiar no nasaun.
Horta dehan, Japaun, Alemaña, Koreia do Súl, Austrália no Inglatera moris karun, maibé Timoroan sira bele servisu ho badinas no simu salariu boot hodi haruka osan mai familia.
“Ha’u hahú ko’alia ho governu Japaun no Alemaña atu simu ita nia joven sira tenki ba servisu iha ne’ebá, lalika moe, ita boot sira servisu iha ne’ebé servisu simu osan di’ak bele hadia imi vida no familia, nune’e mós iha Koreia do Súl no Portugál fasilita ita nia Timoroan barak ba servisu iha Inglatera. Ita labele moe, uluk Portugál nia sidadaun mós ba servisu iha rai liur maka dezenvolve fali sira nian rain,” dehan Horta bainhira hala’o dialogu komuinitária ho komunidade Aldeia Kulau, Suku Becora, Postu Administrativu Kristu Rei, Munisipiu Dili, Kinta, 24 Fevereiru 2022.
Liu tiha ida ne'e, Horta mós partisipasa iha konsolidasaun partidu CNRT iha Bidau Toko-Baru, Kuluhun-Dili.
Komunidade Aildeia Bidau Toko Baru, Suku Kuluhun-Dili antusiasmu simu vizit Premiadu Nobel da Paz, José Ramos Horta hodi hala’o dialogu. Foto TOP.
Horta apela ba joven sira tenki mantein kalma ho paz hodi evita konflitu labele kontinua akontese iha sira nia bairu, nune’e fó tempu ba governu rezolve problema nasaun no buka koordena ho nasaun parseiru sira simu joven Timoroan sira.
Horta dehan, nia sente orgullu tebes, durante ne’e Timoroan barak servisu iha rai liur kontribui selu taxa ba Estadu Timor-Leste.
Alende ne’e, Horta sei koordena ho Governu Timor-Leste oinsá mak buka hadia kapitál Dili tenki organiza didi’ak atu regula uma labele halo arbiru, maibé tenki iha distansiamentu hodi evita uma labele halo rabat malu.
Iha fatin hanesan, Reprezentante Juventude Feto Kulau, Luciana Pereira dehan, juventude prontu apoiu Dr. José Ramos Horta no Maun Boot Xanana Gusmão, importante liu mak kria kampu servisu.
“Amu juventude Kamea presiza liu maka kria kampu servisu, tanba durante tinan barak joven sei moris dezempregu, tanba la iha kampu servisu,” nia hatete.
Parte seluk, Xefe Aldeia Kulau Laletek, Manuel Pereira dehan povu presiza liu maka kandidatu prezidente ne’ebé hatene rezolve povu nia preokupasaun no ajuda povu bainhira hasoru situasaun difisil.
“Ami Suku Kulau Laletek matan haree no akompaña Avo Ramos no Avó Nana ne’ebé sempre hamutuk ho ami no terus hamutuk ho ami, no ami prontu vota Avo Ramos hodi hadia ita hotu nia vida moris,” nia hatete.
Xanana -Horta reprezenta ilas Na’i Jesus Kristu
Entretantu, iha parte seluk Premiadu Nobel da Paz, José Ramos Horta partisipa mós programa kosolidasaun partidu CNRT hodi apoia kondidatura Horta ba prezidente iha iha Aildeia Bidau Toko Baru, Suku Kuluhun Dili.
Iha konsolidasaun ne’e, Reprezentante Juventude Toko Baru, João Bastista de Araújo ho kontente deklara, Xanana no Ramos Horta merese duni ukun, tanba sira nu’udar lider ezemplar no estadista ne’ebé sempre hamutuk ho povu bainhira hadoru susar no terus iha situasaun inundasaun ruma sempre tun direita hodi ajuda povu hakur liu situasaun difisil ne’ebé ataka moris.
“Ami so temi dehan iha Timor ne’e ita boot na’in rua hanesan estadista merese duni ba ita boot na’in rua atu hamutuk, tanba seim Romos Horta, seim diplomata no seim Xanana, seim dezenvolvimentu. Tanba imi rua hanesan ilas na’in Jesus Kristu no sura mós ho ami hanesan imi nia eskolante ne’ebé sei hamoris povu ida ne’e nia moris, atu moris di’ak liután,” nia hatete.
Parte hanesan, Xefe Suku Kuluhun, Deosdato Martins hato’o agradese ba José Ramos Horta hodi bele esplika ninia preparasaun ba povu hodi bele deside kandidatu ida ne’ebé di’ak hodi ukun nasaun ne’e.
“Xefe suku Kuluhun ho familia no ita hotu sei hamutuk vota ba Maun José Ramos Horta hodi tuur iha Aitarak-Laran no sai prezidente ida kualidadeno no sai prezidente ba povu tomak,” nia hatete.
Entretantu Ekipa Susesu Kandidatu Prezidente Repúblika, José Ramos Horta Postu Kristu Rei Jacinto “Kulau”, garante Ramos Horta no Xanana sei manan iha Postu kristu Rei.
Author: Marcelino BataWebsite:https://www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
Jornalista
Jornalista TOP.
Bandu atu simu envelope ka sasan ruma husi fonte informasaun sira.
