DILI (TOP) — Portavóz Brigada Juventude Postu Adminsitrativu Atsabe, Rogeiro dos Santos deklara Atsabe oan prontu apoiu ba kandidatu José Manuel Ramos Horta atu asumi hikas pasta prezidente repúblika ba tinan 2022 to’o 2027.
Portavóz Brigada Juventude ne’e fundamenta, iha Postu Administrativu Atsabe kompostu husi suku 12 hanesan suku Atara, Baboi Craic,Baboi Leten, Batu Mano, Laçao, Laclo, Laubono, Leimea Leten, Malabe, Obulo, Parami, Tiarlelo iha munisipiu Ermera prontu apoiu kandidatu José Manuel Ramos Horta ba Prezidente Repúblika.
“Ami garantia tebes kandadatu José Ramos Horta sei la mosu tan segundu ronde,” Portavóz Brigada Juventude Postu Adminsitrativu Atsabe hateten ba jornalista sira liuhusi komferensia imprensa iha Ai-Mutin, Dili, Sabadu 26 Fevereiru 2022.
Nia hatutan, brigada juventude Atsabe apoiu kandidatura Prezidente Repúblika Dr. José Manuel José Ramos Horta ba periode tinan 2022 to’o 2027.
“Hare ba impase politika ne’ebé mak mosu iha tinan 2017 to’o 2021 halo instituisaun estadu nian la funsiona ho di’ak roda ekonomia rai laran hetan atakasaun bo’ot menus husi 0% hetok aat liu tan hamonu dignidade povu Timor Leste iha komunidade internasionál sira nia matan ho aktu inkonstituisionál iha Parlamentu Nasionál,” nia hateten.
Nia dehan, povu Timor-Leste moris iha ambiente dilematiku, problematiku nia laran. Hare ba sosiadade politika iha estadu Timor-Leste ne’ebé dinamiku tebes.
“Ita presiza lideransa ida ne’ebé iha kapasidade integridade vizionariu no iha pezu atu influensia mós mundu Internasionál,” nia fundamenta.
“Tanba ne’e, ohin sabadu 26 Fevereiru 2022. Brigada Juventude Atsabe deklara ba públiku katak ami depozita tomak ami nia konfiansa no ami nia votu ba kandidatura prezidente Repúblika José Manuel Ramos Horta hodi asumi hikas pasta prezidente repúblika ba periode 2022 to’o 2027,” nia informa.
Portavós ne’e fó razaun halo reposisaun ba orgaun repúblika demokratiku no konstitusionál ne’ebé violadu.
Daruak hatudu hikas kredibilidade nasaun no povu Timor Leste iha Mundu Internasionál nia matan ho dignu.
Datoluk, Prezidente repúblika ida ne’ebé uja nia kompetensia tuir konstituisaun no la sai oposisaun ba governu ne’ebé maka sei mosu
“Ho rajaun hirak ne’e, ami mós apela ba inan-aman, juventude no estudante Atsabe oan tomak ne’ebé maka iha teritoriu Timor laran tomak no mós iha estranjeiru atu iha sabadu 19 Marsu 2022 fó ita nia votu tomak ba kandidatura Prezidente Repúblika José Manuel Ramos Horta ho númeru sorteiu 14 hodi sai prezidente Repúblika ba 2022 to’o 2027”.
Nia argumenta, vota ba José Manuel Ramos Horta, vota mós ba povu no nasaun Timor-Leste nia distinu.
Iha fatin hanesan emprezariu Timor-oan, Sansão Gomes akresenta, nia parte fiar katak espiritu ne’ebé maka juventude no estudante sira nia korajen makaas dalaruma iha karidor politika.
“Ita iha diferensia itoan maibé liuhusi koordenador hateten ona katak iha sabadu 19 Fevereiru 2022 rezultadu iha postu administrativu atsabe Dr. José Manuel Ramos Horta tenke manan iha ne’ebá,” nia hateten.
“Ha'u fiar imi sei halo servisu ida ne’e lao door to door ne’e maka importante tebes esplika ba ita nia inan aman sira kona ba ita nia kandidatura ninia númeru sorteiu 14 juventude sira sei esplika didiak ba sira atu nune’e sira bele vota ho loloos atu nune’e ita bele lori ita nia kandidatura ba vensedor iha elesaun prezidensia ida ne’e”.
“Ha'u depozita konfiansa tomak ba ita boot sira hanesan Atsabe oan. Hau la promete buat barak maibé karik buat ruma konta ho hau nia apoiu,” nia dehan.
Iha fatin hanesan reprezentante partidu CNRT Jacinto Rigoberto hateten, nia hanesan individu imi nia maun Atsabe oan nu’udar mós kuadru superior partidu CNRT lori mós maun boot Kay Rala Xanana Gusmão nia fatin no lori mós kandidatu Dr. José Manuel Ramos Horta ninia fatin hato’o agradesementu ba juventude atsabe oan tomak.
“Tanba hau ata maka mós tama iha ekipa susesu maun kandidatura José Manuel Ramos Horta ninian. Agradese boot ba imi ninia konfiansa imi nia determinasaun no imi nia vizaun politika ne’ebé maka aas hanesan ohin reprezentante koodenador imi nian aprezenta ona” nia hateten.
“Ha’u nia hakuak boot husi hau no mós maun boot nain rua ba imi hotu hanesan juventude sira mai husi Partidu FRETILIN no juventude sira mai husi partidu Demokratiku seidauk. Satan imi hotu hotu mesak juventude intelektual maka imi hamutuk hanesan ne’e hau fiar katak kaisa atsabe númeru sorteiu 14 maun José Ramos Horta sei manan iha Atsabe,” nia dehan.
