DILI (TOP) — Brigada Lere Anan Timur (LAT) mós rekoñese ona katak, durante ne’e Timor-Leste hasoru hela problema impasse politika ne’ebé seidauk iha solusaun final to’o ohin loron. Tanba ne’e, portavós Brigada Lere Anan Timur (LAT) Rigo Freitas promete katak, bainhira kandidatu Tito da Costa Critovão Lere Anan Timur mak hetan vitoria iha eleisaun prezidensial tinan ida ne’e sei rezolve kedas impasse politika ne’e iha rai-laran.
Nia hatutan, Brigada Lere Anan Timur prontu serbisu no konjunta forsa hamutuk ba povu tomak hodi fó apoiu ba kandidatura Prezidente Repúblika Tito da Costa Critovão Lere Anan Timur ba periode 2022 too 2027.
“Tinente Lere Anan Timur hodi bele hakotu impase politika ne’ebe maka dadauk ne’e hatodan hela ekonomia estadu RDTL ninian,” Portavós Brigada Lere Anan Timur (LAT) Rigo Fretas ba jornalista sira, liuhusi Konferensia Imprensa iha Largo Lecidere, Dili, Sabadu 26 Fevereiru 2022.
Nia esplika, iha loron 20 fulan Maiu 2002 Mundu Internasionál rekoñese Repúblika Demokratika Timor Leste nu’udar nasaun soberanu Independensia hanesan mós estadu direitu demokratiku iha sudeste asiatiku.
“Objetivu husi independensia atu lori povu Timor Leste ba moris diak no hakmatek husi dezemvolvimentu nasionál sivil, politika, ekonomia, social no kultura,” nia hateten.
Nia dehan, Republika Demokrátika Timor-Leste iha nia orgaun 4 mak hanesan Prezidente Repúblika, Parlamentu Nasionál, Governu no Tribunál. Organu sira ne’e nu’udar ai-rin ba Estadu RDTL ne’ebé importante tebes hodi garantia moris di’ak ba povu.
Nia hatutan, atu hamosu orgaun hirak ne’e, liuhusi eleisaun determinadu tuir konstituisaun RDTL iha artigu 65 númeru 1. Orgaun lelitu soberanu nian ho poder lokal sei hili tuir eleisaun husi eleisaun livre universal livre direitu sekretu ema ida votu no periodika.
Tanba ne’e iha loron 28 janeiru 2022 Prezidente repúblika Franscisco Guterres Lu Olo dekreta eleisaun Prezidensial ba periode 2022 too 2027.
Nune’e iha loron 4 Fevereiru 2022 tenente jenerál Tito da Costa Cristovão komandante revolusionáriu Lere Anan Timor anunsiu ba públiku iha Ainaro nu’udar kandidatu independente hodi kompete iha eleisaun prezidensial ba periode 2022-2027.
“Marka diferensia ha’u laiha osan atu fó ba povu maibé ha’u iha de’it domin unidade no paz, estabilidade, solidaridade no justisa. no dezenvolvimentu nasionál”.
“Iha loron 12 Fevereiru 2022 juventude kompostu husi munisipiu 12 no RAEOA halo diskusaun iha largo Lecidere forma brigade Lere Anan Timur sai hanesan forsa politika ida atu apoiu kandidatura independente Tenente Jeneral Lere Anan Timor iha eleisaun Prezidensial 2022-2027,” nia informa.
Nia promete, Brigada Lere Anan Timur fó votus konfiansa tomak ba kandidatura independente Tito da Costa Cristovão Tinente Jeneral Lere Anan Timur atu hetan vitoria iha eleisaun prezidensial hosi servi povu no estadu RDTL.
“Lere Anan Timur ho nia filosofia katak marka diferensia hau laiha osan atu fahe ba povu Timor-Leste maibé hau iha domin Unidade Paz no Estabilidade solidaridade no Justisa hirak maka xave ba dezemvolvimentu”.
Brigada Lere Anan Timur garantia katak, kandidatu ne’e bainhira hetan vitoria, nia sei servi povu no nasaun tuir demokrásia konstituisionál ne’ebé vigora ona iha konstituisaun Repúblika Demokratika Timor Leste artigu 85 kompentensia rasik.
Promove dialogu ba lider politika sira no orgaun soberanu RDTL hodi garantia unidade asaun ba progresu tuir lema RDTL, tetu di’ak Orsamentu Jerál Estadu antes promulga.
Konsidera direitu, liberdade espresaun sidadania sira nian hodi kombate injustisa no diskriminasaun sosiál.
