MALIANA (TOP) – Militante kuaje 400 husi partidu politika tolu iha munisipiu Bobonaro desidi halo ona afiliasaun ba partidu CNRT ho objetivu atu fó vitoria ba kandidatura Prezidente Repúblika, José Ramos-Horta ho númeru sorteiu 14 iha eleisaun prezidensial ne’ebé sei akontese iha loron Sábadu, 19 Marsu 2022.
Tuir dadus afiliante sira ne’ebé fó sai husi Koordenador CNRT postu Maliana, Agustinho Caetano katak, afiliante husi suku 7 iha postu administrativu Maliana ne’e hamutuk ema nain 403.
Afiliasaun ne'e akontese iha loron 27 Fevereiru 2022 iha Maliana ne'ebé partisipa direita husi Prezidente partidu CNRT, Kay Rala Xanana Gusmão.
Afiliante husi suku Holsa hamutuk ema nain 125, afiliante husi suku rai-foun hamutuk nain 57, husi aldeia Hatu-Laka hamutuk ema nain 120. Afiliante husi Saburia hamutuk nain 70, husi suku Ritabou nian hamutuk nain 36. Husi maluk difisiente sira hamutuk nain 20 mós desidi ona hodi fó sira nian votu ba partidu CNRT iha eleisaun parlamentar 2023, no mós ba kandidatu ho númeru sorteiu 14 iha eleisaun prezidensial ne’e.
Nia dehan, mosu no akontese afiliasaun barak hanesan ne’e tanba iha esforsu maka’as husi Miguel Manetelo.
Iha fatin hanesan, koordenador Partidu Libertasaun Popular (PLP) suku Lahomea katak, durante ne’e nia observasaun governasaun atual ne’ebé lidera husi Prezidente PLP ladun halo dezenvolvimentu maka’as. Tanba ne’e nia desidi ho nia militante PLP sira husi nia suku rasik afilia ba CNRT hodi depozita sira nia votu ba kandidatu Prezidente Repúblika, José Ramos-Horta.
Afiliante sira husi Partidu Demokrátiku sira mós deklara, sira lakohi atu estraga sira nia votu ba kandidatu seluk, tanba tuir sira katak, so kandidatu José Ramos-Horta mak iha kompetensia masimu hodi sai Prezidente Repúblika atu bele hadia imajen Timor-Leste nian tantu iha rai-laran no iha rai-liur.
Nune’e mós reprezentante afiliante husi partidu FRETILIN, Aquilino Afonso deklara, rajaun afilia ba partidu CNRT atu bele hadia nasaun Timor-Leste bao in, no suporta kandidatu José Ramos-Horta ba hetan vitoria iha eleisaun prezidensial ne’ebé sei akontese iha loron 19 Marsu 2022.
Hafoin deklarasaun afiliante sira husi partidu politiku hirak ne’e, Prezidente partidu CNRT, Kay Rala Xanana Gusmão simu afiliante hirak ne’e ho laran ksolok tebes, no husu ba afiliante sira atu mai hamutuk ho partidu CNRT to’o eleisaun parlamentar iha tinan 2023 hodi bele hadia buat naksalak sira ne’ebé durante ne’e akontese iha tinan hirak nia laran, no halais prosesu dezenvolvimentu ba oin.
