Osan rihun $70 ba Ambeno atu “halo festa duni”

SANTA ROSA (TOP) — Presidente Autoridade ba Rejiaun Administrativu Espesiál Oe-Kusi Ambeno (RAEOA) Arsenio Paixão Bano hateten nia husu osan hamutuk rihun $70 iha Orsamentu Jeral Estadu (OJE) ba tinan 2021sei gasta duni ba festa ofisial sira ba tinan ida nian, la’os ba festa individual.

“OJE 2021 montante $ 70 mill ne’e dekorasaun seremonia ba tinan ida tomak la’os de’it, tinan ida ka rua ne’e ba seremonia ofisial hotu-hotu,” hateten Bano ba jornalista sira hafoin remata inagura sede sukursal BNCTL, iha Santa Rosa, Oe-Kusi Ambeno, Sesta 20 Novembru 2020.

Montante osan ne’e sei gasta duni ba halo festa sira iha Oe-Kusi Ambeno, maibé la’os ba festa kazamentu individual sira.

“Osa ne’e atu gasta ba festa seremonia ofisial sira iha tinan 2021,” Bano esplika.

Festa ba seremonia ofisial sira ne’e Bano refere ba bainhira bainaka sira husi nasionál hanesan vizita ruma husi Prezidente Repúbliku, Primeiru-Ministru ho nia membru governu sira ka deputadu sira bele uja de’it osan ne’e. Osan ne’e mós atu uja ba komemorasaun loron nasionál sira hanesan loron 20 Maio, 28 Novembru no loron nasionál sira seluk.

“Seremonia sira hanesan 20 Agustu halo reseisaun ba 20 Maiu, loron Oe-Kusi nian, seremonia ofisial ba populasaun, seremonia ofisial kuandu Prezidente Repúblika, Primeiru Ministru, ministru sira no deputadu sira mai mai karik, halo reseisaun,” Bano esplika.

Bano kontinua defende osan rihun $70 hodi dehan, husu fali tok ba deputadu sira atu bele check didi’ak iha seremonia nasionál ne’e gasta osan hira? Loron espesial 20 Maiu de’it gasta milaun ida resin.

“Orsamentu rihun $70 ba RAEOA ne’e tinan ida tomak nusa mak ita halo tiha hanesan notisia boot iha Oe-Kusi,” Bano preokupa.



 

Mane foun Australia ne’e hatutan, Oe-Kusi Ambeno ne’e rai ketan, do’ok husi Dili, Oe-Kusi Ambeno tenke simu ema di’ak, halo seremonia didi’ak tanba rai ketan, maibé faktu hatudu durante ne’e Bano monta nia ema sira hodi duni ema sira ne’ebé ideolojia no orientasaun politika la hanesan ho nia, no duni mós jornalista sira bainhira husu pergunta kona-ba osan adisional millaun $14 ne’ebé atu uja ba hadia ro HAKSOLOK iha Portugal.

Notisia relevante: Oe-Kusi Ambeno’s authorities expelled journalists during press conference.

“Ami dok husi Dili Tradisaun ne’e tenke halo reseisaun di’ak ba ema mai husi nasional,” nia hakotu.

Hahalok seluk maka hafoin simu posse ba Prezidente Autoridade RAEOA, no foin fila ba Oe-Kusi Ambeno seidauk to’o tinan, Bano tebe sai funsionariu kontratadu sira hamutuk 83 ne’ebé la’os mai husi partidu FRETILIN.

Nia mós involve iha kazu agresaun fizika ida hasoru mestre ida iha Oe-Kusi Ambeno ne’ebé ikus mai Tribunal Ambeno kondena nia fulan 5 no selu multa ba lezadu Domingos Nesi iha loron Segunda 24 Agustu 2020.

Entretantu, antes ne’e deputada Fernanda Lay husi bankada CNRT kestiona Bano atu justifika kona-ba osan rihun $70 ne’ebé preve iha OJE 2021 ne’e atu halo saida. Bano esplika ona, osan sira ne’e la’os atu uja ba festa individual iha kada semana, maibé prepara atu uja ba festa ofisial sira iha Oe-Kusi Ambeno.

"Arsénio Bano ko’alia kona-ba OJE 2020, sira tau rihun $52 atu halo dekorasaun no halo festa, depois ami husu ita boot halo festa ho OJE Arsénio dehan Sim. Arsénio Paixão Bano dehan, segunda to'o sesta ami halo serbisu, maibé Sesta ba oin ami halo festa, no iha OJE 2021 sira tau tan rihun $70," deputada Fernanda Lay dehan liuhusi konferénsia Imprensa ne’ebé hala’o iha salaun CNRT, Parlamentu Nasional, Dili, Kuarta 18 Novembru 2020.

Deputada ne'e sente triste no lamenta tebes tanba osan rihun $52 no rihun $70 ne'e povu nian, autoridade RAEOA gasta hodi ba halo fali festa iha kada fim de semana.

"Dokumentu iha ne'e kompletu, ha’u komprova, tanba iha dokumentu OJE 2021 nian sira tau tan rihun $70 atu halo dekorasi no halo festa. Ida ne'e atu konvida povu ka, autoridade sira maka ba han mesak," Fernanda kestiona.

Nia konsidera prezidente RAEOA nia planu ida ne'e gasta de’it povu nia osan, tanba uza tiha osan ba halo festa, fila uza karreta estadu soke malu iha Ambeno.

Marcelino Bata
Author: Marcelino BataEmail: Este endereço de email está sendo protegido de spambots. Você precisa do JavaScript ativado para vê-lo.

PUBLISIDADE